Euskal sindikatuek prekarietatea salatu dute Maiatzaren Lehenean

Euskal sindikatuen Maiatzaren Lehena ospatu dute gaur, eta lanaren prekarietatea eta krisi ekonomikoan egon diren gobernuek ezarri dituzten murrizketa neoliberalak salatu dituzte.

Euskal industriaren defentsa, batez ere siderometalurgiarena, Euskadin ospatu den Maiatzaren 1eko aldarrikapen nagusienetakoa izan da, baita datorren ekainaren 26an izango diren hauteskunde orokorrei eta errefuxiatuen krisiari egin zaien erreferentziak ere.

Bilboko Kale Nagusian bildu dira manifestazio handienak: ELArena, UGT eta CCOO sindikatuena eta LSB-USO, Steilas, ESK eta CGT sindikatu txikiek batera egin dutena ere. LABek, bere aldetik, bere martxa nagusiena Donostian egin du, baina baita altzairuaren krisia gogor jotzen duten udalerrietan ere; besteak beste, Sestao, Zumarragan edo Laudion.

Bilbon batu diren milaka manifestarien artean, ezkerreko alderdietako ordezkariak egon dira: Idoia Mendia (PSE-EE), Nagua Alba (Podemos), Pello Urizar (Eusko Alkartasuna) eta Isabel Salud (Ezker Anitza-IU).

Donostian, ehunka pertsona gerturatu dira LAB sindikatuaren deialdira. Han izan dira Ainhoa Etxaide sindikatuko idazkari nagusia, baita ezker abertzaleko buru diren Rufi Etxeberria eta Joseba Permach eta EH Bilduko parlamentarioa den Marian Beitialarrangoitia ere.

CCOO eta UGT sindikatuak Gipuzkoako hiriburuan ere atera dira kalera. Martxa horretan sozialisten hainbat ordezkari parte hartu dute, horixe izan da Iñaki Arriola, Rafaela Romero eta Odon Elorzaren kasua zein Zumarragako ArcelorMittaleko hainbat langile ere.

Gasteizi dagokionez, CCOO eta UGT sindikatuak Andra Maria Zuria plazatik abiatu dira; ESK, CGT, CNT eta Steilas Europa Jauregitik eta LAB Bilbo plazatik.

Adolfo 'Txiki' Muñoz ELAko idazkari nagusiak gogor kritikatu du Eusko Jaurlaritza, sindikatuen aurkakoa den "patronalaren estrategia partekatu eta laguntzeagatik eta, bere esparruan lan-erreforma aplikatzeagatik". Horrez gain, aurrekontuetan langileen baldintzak (batez ere azpikontratetakoena) okertzen dituen austeritatea darabilela leporatu dio.

Bilbon egin duen mintzaldian, Muñozek mobilizaziorako deia egin du, injustiziak hedatzen ari diren egoeran, grebak funtzionamendu demokratikoaren adierazle direlako, eta LABi elkarrekin jarduteko deia egin dio, gizarte mugimenduekin batera, "gizarte gatazka aktibatzeko", eta "kapitalaren eraso gupidagabeari" aurre egiteko.

Bestalde, Ainhoa Etxaidek, Donostian bildu diren hedabideei adierazi dienez, LABek "ahalegin guztiak egingo ditu lan gatazka suspertzeko" Confebask patronalaren jarrerari eta "mugagabe hedatzen ari den prekarietateari" aurka egiteko.

CCOO eta UGT sindikatuetako arduradun nagusiek (Unai Sordo eta Raúl Arza, hurrenez hurren) sindikatuek egindako lana nabarmendu nahi izan dute, eta herritarrei dei egin diete politikoekiko duten "asperraldia" gainditu eta ekainaren 26an bozkatzera joan daitezen, Alderdi Popularraren lan-erreforma kenduko duen gobernu-aldaketa eman dadin.

Aldi berean, Eusko Jaurlaritzari eskatu diote industriaren defentsan politika aktiboa izan dezala, multinazionalek Euskadin lantegiak itxi ez ditzaten, eta lan horretan sindikatuak aintzat izan ditzala.

CCOO eta UGTren martxaren buruan errefuxiatuei ongietorria ematen zieten hesi bat eraman dute.