Euskal Herriko laborariek astearteko 10:00ak arte izango dute AP-8 autobidea blokeatuta Biriatun
Hego eta Ipar Euskal Herriko ehunka nekazari eta abeltzain Biriatuko mugan elkartu dira beren traktoreekin gaur goizean, eta mugaz bi aldetako zirkulazioa oztopatu dute. Azkenean, ordea, Iparraldeko traktoreekin moztu dute trafikoa bi norabideetan, Frantziako Poliziak Gipuzkoatik eta Nafarroatik zetozenak geldiarazi dituztelako. Hori dela eta, ibilgailuak Irunen utzi eta oinez igo behar izan dute autobidera.
Hasierako asmoa Biriatuko pasabidea 10:00etarako moztea bazen ere, auto ilarak eta agintarien debekuak tarteko, ez dute helburua lortu 10:20 arte.
Protestak 24 ordu iraungo du, astearteko 10:00ak arte, baina ez da baztertzen mobilizazioak mugagabe bihurtzea. Merkantzien zirkulazioa etengo dute mugan, baina bestelako ibilgailuei igarotzen utziko diete (autoak edo larrialdietako ibilgailuak, kasu). Hala ere, errei bakarra dago zabalik. 16:45ean, EAErako bidean ilarak "oso laburrak" ziren, kilometro erdi eskasekoak, Segurtasun Saileko iturriek eitb.eusi azaldu diotenez. 17:00etan, A-63an, berriz, Biriatutik Donibane Lohizuneraino (Lapurdi) iristen ziren ilarak.
Errepideetan egun korapilatsua izatea aurreikusten denez, protestak iraun bitartean, muga inguruan joan-etorriak saihesteko gomendatu dute agintariek.
Parte hartzaileek banderola erraldoia zintzilikatu dute Biriatuko ordainlekuan, "hemen hasten da Europako laborantzaren erresistentzia" zioen mezuarekin. Gainera, ohartarazi dute udazkenerako akordiorik edo jarrera aldaketarik ez bada, udazkenetik aurrera egun gehiagotan blokeatuko dutela mugako pasabidea.
Argazkia: AFPren bideo batetik ateratako irudia
Estatu mailako plataforma independente eta elkarte asindikalek egindako protestara batu dira Arabako, Gipuzkoako eta Nafarroako Ataca, Bagea eta 6F nekazari taldeak ere. 06:00etan elkartu dira Beasainen eta Zarautzen eta bi zutabetan iritsi dira Astigarragara. Handik Irunera abiatu dira eta han elkartuko dira Nafarroatik eta Arabatik etorritako nekazari eta abeltzainekin. Iparraldeko laborariak, berriz, 08:00etan irten dira Beskoitzetik.
Deitzaileen arabera, nahita antolatu dituzte protesta hauek Europako Parlamenturako hauteskundeak egingo diren asterako; izan ere, Europako arauak moldatzea dute helburu nekazariek. Besteak beste, inportazioko produktuen gaineko kontrol handiagoa izatea, bertako produkzioei lehentasuna ematea eta elikagaiak ekoizteko zergak murriztea lortu nahi dute mobilizazio hauekin.
"Europan sartzen diren elikagaien gaineko kontrol handiagoa" ere eskatzen dute, eta horiek behar bezala arautzea. Elikagai-katearen araudia berrituta, tokiko produktuak lehenesten dituen lege europarra aplikatzea ere nahi dute.
Biriatun ez ezik, deitzaileek trafikoa moztu dute Espainiako Estatuaren eta Frantziakoaren arteko beste zazpi puntutan.
Hala, goizean goizetik, AP-7 autobidea erabat itxita dago Jonqueran (Katalunia), Frantziarako noranzkoan, protestak direla eta.
Aragoin, elkartutako nekazariek indarrak batu dituzte frantziarrekin, eta N-330 errepidea moztea lortu dute Canfrancen, baita A-136 errepidea ere Portaleten.
Muga horretara autobus bat joan da manifestariekin, eta beste batzuk Somporteko pasabidera joan dira, Canfrancen. Bertara traktoreak ere iritsi dira. Portaleten, berriz, nekazari frantziarrak mobilizatu dira lanerako makineriarekin.
Albiste gehiago ekonomia
BBK Live jaialdiak 23,6 milioi euro baino gehiago utzi ditu Bilbon
115.000 parte-hartzaileen artean, % 17 atzerritarrak dira, batez ere Erresuma Batutik, Frantziatik, Italiatik eta Portugaldik etorritakoak. Gainera, hotelen okupazioa % 90etik gorakoa izan da musika jaialdiak iraun duen bitartean.
ELAk eta LABek ziurtatu dute Torresek proposatutako gutxieneko soldataren igoerak 10.000 langileri bakarrik eragingo liekeela
Uste dute proposamenak ez dituela kontuan hartzen enpresek azken urteetan lortutako irabaziak, ezta beren plantillek sortzen duten produktibitatea ere, eta, horrenbestez, helburua ez dela "gizarte-kohesioa, ezta aberastasunaren banaketa justua ere".
BSHko langileek datorren astean bozkatuko dute lan- erregulazioko espedienteari buruzko aurreakordioa
Enpresa batzordearen gehiengoak (LABek eta ELAk, ez) aurreakordioa lortu du aste honetan zuzendaritzarekin, eta, horren arabera, lantegia itxi eta 609 pertsona kaleratuko dituzte. Langileen ordezkariek deituta, batzarrak egingo dituzte ostiral honetan, eta bozketa, ziurrenik, astelehenean egingo dute.
Langile bat hil da Gasteizen teilatu batetik erorita
Istripua asteartean gertatu zen, baina gaur eman da jakitera. Langilea 7 metroko altueratik erori zen.
Bruselak espedientea ireki dio Espainiari, BBVAk Sabadellen akzioak eskuratzeko operazioan erabilitako legeengatik
Europako Batzordearen ustez, kapitalen zirkulazio askearen aurkakoak dira Espainiako Gobernuak operazio hau baldintzatzeko erabili dituen legeak. Eta 2 hilabeteko epea eman diote Espainiako Gobernuari azalpenak emateko.
Portugalete eta Leioa lotuko dituen ibai azpiko errepideak 2026ko lehen seihilekoan hasiko dira, 543 milioiko aurrekontuarekin
Elixabete Etxanobe Bizkaiko diputatu nagusiak defendatu duenez, itsasadarraren azpiko tunela "ez da ez kapritxo bat, ezta burutazio bat ere", eta bai, ordea, lurraldearentzako "behar bat".
Euskal kostaldean udan pisua alokatzea gutxi batzuen eskura dagoen luxua bilakatu da
Opor garaiko alokairuen prezioak % 40 igo dira azken bost urteetan. Jabe askok etekin ekonomikoa bilatzen dute: nahiago dute alokairuen epeak laburtu eta diru-sarrerak handitzea.
Euskal ekonomia % 2,2 hazi da iaztik
Enpleguak % 1,4 egin du gora bigarren hiruhilekoan, Eustaten datuen arabera. Lehen hiruhilekoarekin alderatuta, igo egin dira bai BPGa (% 0,5), bai enplegua (% 0,3).

Eusko Jaurlaritzak 1.385 eurorainoko tartea aurreikusi du EAEko gutxieneko soldata negoziatzeko
Eusko Jaurlaritzak Euskadiko hitzarmenetan gutxieneko soldata planteatu du Euskadin: 1.268 eta 1.385 euro gordin artekoa 14 ordainsaritan, hau da, Estatuarekin alderatuta % 7 eta 17 gehiago.

Hauek dira Euskadik kudeatuko dituen sendientzako laguntza berriak
Eusko Jaurlaritzak bere gain hartuko du Gizarte Segurantzaren kotizazio gabeko hainbat familia-prestazioren kudeaketa eta ordainketa, Euskadin 20.000 pertsona ingururentzat onuragarria izango den eta 100 milioi euro inguruko inbertsioa suposatuko duen transferentzia baten bidez.