Expovacaciones azokak 200 helmuga eta 100 jarduera baino gehiago hartuko ditu maiatzaren 9tik 11ra

Barakaldoko BECek Expovacaciones azokaren 45. edizioa hartuko du maiatzaren 9tik (ostirala) 11ra (igandea). Topaketak 200 helmuga eta 100 jarduera turistiko eta gastronomiko baino gehiago bilduko ditu, eta gehienak Espainiako lurraldeen ordezkariak izango dira.

Besteak beste, Andaluziak, Aragoik, Kanaria Uharteek, Kantabriak, Valentziako Erkidegoak eta Kataluniak hartuko dute parte. Eusko Jaurlaritzak eta Bizkaiko Foru Aldundiak gune propioa izango dute, "bertako turismoaren balioa" irudikatzeko, Xabier Basañez BECen zuzendari nagusiak asteazken honetan prentsaurrekoan azaldu duenez. Portugal eta Kuba izango dira nazioarteko eskaintza nagusietako bi.

Edizio honetako ardatzak "Experimentatu eta Dastatu" izango dira berriro ere. Azokak iraungo duen hiru egunetan, BECeko 1. pabiloian 100 jarduera baino gehiago egingo dira, hala nola origami tailer bat, ipuin kontaketak, artisautza lanak eta parapente simulagailu bat.

Jarduera gastronomikoen artean, bisitariek hamaika jatorritako produktuak izango dituzte dastagai, hala nola gaztak, olioak eta ardoak. Gainera, sagardo eta talo dastaketa egingo dute 'Txotx-Experience' gunean, hau da, bertako produktuen gunean.

Azoka paraleloak

Expovacaciones azokak hartzen duen pabilioiaren barruan hiru azoka egingo dira, "eskaintza osatzeko eta bidaiak ulertzeko eta gozatzeko modu berriak gerturatzeko", BECen zuzendari nagusiak gaineratu duenez. Caravaning, gurpil gaineko turismorako; FVO, Bigarren Eskuko Ibilgailuen Azoka, eta SET Congress, "pantaila turismoaren" lehen edizioa, esan nahi baita, ikus-entzunezko ekoizpenak hartu dituzten lekuetarako turismoa.