Prezipitazio handiek arazo ugari eragin dituzte euskal errepideetan
Euriak zenbait arazo eragin ditu euskal errepideetan igande goiz honetan, eta hainbat tokitan urak gainezka egin du eta arazoak sortu dira. Prezipitazio handien eraginez, lau pertsona zauritu dira Iruña Okan izandako zirkulazio istripu batean. Arabako Foru Suhiltzaileek jakitera eman dutenez, 12:00k aldera hiru ibilgailuk elkarren aurka talka egin dute AP-1 autobidean, Irungo noranzkoan, oraindik argitzeke dauden arrazoiak direla eta.
Eusko Jaurlaritzako Trafiko Zuzendaritzak azaldu duenez, istripu horren eraginez bi errei itxi behar izan dituzte, eta hiru kilometrorainoko auto-ilarak sortu dira.
Halaber, 7 kilometrorainoko auto-ilara handiak egon dira AP-8 autobidean, Irungo bidesariaren parean, Kantabriarako noranzkoan.
Bestalde, prezipitazio handien eraginez Bilboko hainbat kaletan sortu diren zenbait arazoetan lan egin behar izan dute Bizkaiko suhiltzaileek eta Bilboko Udaltzaingoak.
Bizkaiko DYA erakundeko anbulantzia batek istripua izan du Bilboko Kastrexana auzoan, Sodupen (Bizkaia) pertsona bat artatu ostean.
Azken orduotako euri-jasa handiek ur-putzu handiak utzi dituzte euskal errepideetan. Arrazoi horregatik, abiadura moteltzeko aholkatu die trafiko zuzendaritzak gidariei. Larrialdi Zerbitzuak azaldu duenez, Euskal Autonomia Erkidegoko (EAE) kaleetan eta errepideetan ur-putzuek eragindako arazoekin zerikusia izan duten 53 gertakariren berri izan dute goizean.
Hegaldi bat desbideratu dute
Loiuko aireportuan lur hartu behar zuen Lufthansa konpainiaren hegaldia Valladolideko aireportura desbideratu dute haizearen eraginez, AENAk jakitera eman duenez.
Hegazkina Munichetik (Alemania) zetorren, eta 10:45 inguruan iritsi behar zen Bilbora. Alabaina, eguraldiaren eraginez Valladolidera desbideratu behar izan dute.
Abisu horia
Goizeko lehen ordutik oso nabaria izan da eguraldiaren aldaketa. Izan ere, goizaldean zerua hodeituz joan da, eta prezipitazio handiekin batera tenperaturek behera egin dute nabarmen. Fronteari loturiko zaparradak ugarituz eta indartuz joango dira, batez ere eguerdi partean eta arratsaldeko lehen orduetan. Ekaitzak ere gogor jo dezake zenbait tokitan metro koadroko 20 litro ur baino gehiago pilatu daitezke ordubetean, bereziki ekialdean.
Eusko Jaurlaritzako Segurtasun Sailak abisu horia ezarri du igandeko 21:00ak arte Euskadin, prezipitazio iraunkorrak izango direla iragarri baitute. Gauzak horrela, zerua oso hodeitsu eta estalita egongo da egun osoan zehar.
Datozen orduei begira, haizea ipar-mendebalderantz aldatuko da. Aldaketa horrek haize-bolada bortitzak utziko ditu kostaldean. Zaparrada handiak espero dira, batez ere eguerdi partean eta arratsaldeko lehen orduetan. Noizbehinka ekaitzak jo dezake, eta, orokorrean, tenperatura asko jaitsiko da.
Gauzak horrela, Bizkaian eta Araban ordubetean metro karratuko 20 eta 40 litro artean pilatu daitezke, eta Gipuzkoako ekialdean, berriz, 60 litro biltzera iritsi daitezke.
Bestalde, Hernaniko (Gipuzkoa) Lastaola industrialdean atzo behera etorri zen zubiak Urumea ibaiaren ibilguaren gainean utzitako hondakinak garbitzen ari dira beharginak, ur-goraldietan ez buxatzeko.
Alerta laranja ezarri dute Nafarroan
Nafarroan euri-jasak eta haize-bolada bortitzak utzi ditu Leslie zikloiak penintsularen iparraldean eta ekialdean. Halaber, beste fronte aktiboen presentziak euri-jasa oso bortitzak utzi ditzake, eta zenbait tokitan 50 litro metro karratuko pilatu daitezke ordubetean.
Espainiako Gobernuko Barne Ministerioko Babes Zibilak agiri batean azaldu duenez, Nafarroan prezipitazio iraunkorrengatik ezarri duten alerta laranja goizaldera arte egongo da indarrean.
Nafarroako Gobernuak jakinarazi duenez, momentuz ez da ezer larririk gertatu, nahiz eta Leslie zikloiak prezipitazio handiak utzi dituen.
Larrialdi zerbitzuak "kontu handiz" ibiltzeko deia luzatu die herritarrei, bereziki haize-ufada zakarrak espero diren orduetan kalera irten behar izanez gero.
Foruzaingoak "oinarrizko aholku" batzuk zabaldu ditu sare sozialen bidez eta, besteak beste, zuhaitz ugari dauden tokietatik ibili ez daitezen eskatu die nafarrei.
Bost erromes erreskatatu dituzte Izandorren
Larrialdi zerbitzuek Izandorreko aterpetik gertu galduta zeuden bost erromes korear erreskatatu behar izan dituzte igande arratsalde honetan, eguraldi kaskarra tarteko ezin izan baitute haien ibilbidearekin jarraitu.
Erromesek 15:00ak aldera eman dute abisua, eta lekura suhiltzaileak hurbildu dira, Nafarroako Gobernuak jakitera eman duenez. Orreagaraino eraman dituzte bostak, baina ez da inor zauritu.
Beste alde batetik, goizean Aralar mendilerroan azaldu den lainoaren eraginez galdu diren bi mendizale erreskatatu behar izan dituzte suhiltzaileek.
Zure interesekoa izan daiteke
Abuztuaren 15ean Maroko eta Ceuta arteko muga berriro zeharkatzeko deia egiten ari dira sare sozialetan
Ceutako Gobernuaren bozeramaileak ziurtatu duenez, Espainiako Gobernuak deialdi horren berri du, eta iragan asteko krisia ez errepikatzeko baliabide nahikoak jartzea espero du.
Uharteko bizilagunak haserre, herriko apaizak Ceutako migrazio-krisiari buruz egindako adierazpenengatik
Uharteko (Nafarroa) biztanleak haserre daude Javier Aizpun herriko parrokoarekin, X sare sozialean (lehengo Twitter) migratzaileak Ceutara iristeari buruz zabaldu zituen mezuengatik. Kritiken ostean, apaizak barkamena eskatu du eta bere kontua ezabatu du. Argitalpenetako batean, apaizak zioen "Rabat bonbardatu" egin behar dela, Marokoren aurkako neurri gogorrak ezartzearen aldeko hainbat mezurekin batera. Aizpunek adierazi zuen, halaber, suarekin erantzun beharko litzaiekeela Ceutan sartzen saiatzen diren migratzaileei, eta Maroko "errekonkistatzea" proposatu zuen, haren hitzetan, "jatorrizko Espainia" berreskuratzeko, Erromatar Inperio garaiko Hispaniari erreferentzia eginez.
Nola ikusiko da eguzki-eklipsea zure herritik? Kontsultatu hemen fenomeno historikoari behatzeko mapak
Ilargiak erabat ezkutatuko du Eguzkia 2026ko abuztuaren 12an: Euskal Herrian 2183. urtera arte ez da berriro ikusiko horrelako fenomenorik. Eguzki-eklipse osoa ilunabarrean hasiko da, eta egunak "bi ilunabar" izango ditu. Eklipsea Orain.eus-en bidez zuzenean jarraitu ahal izango da.
Perez-Iglesias: "Eklipsea ikusiko den lekuetan milioi bat bisitari izango dira"
Eklipsea etxetik gertu eta urrun joan gabe ikusteko gomendioa egin du sailburuak. Milaka betaurreko banatu dituzte iada mugarritzat jo duen fenomenoa ikusteko. Pozik agertu da eklipseak zientzia plazara eramateko balio izan duelako.
Kolon eta ondesteko minbiziaren baheketak erdira murriztu du hilkortasuna Euskadin
Biogipuzkoako eta EHUko ikertzaileak buru ditu ikerketak eta JAMA Network Openen argitaratu dute. Horren arabera, kolon eta ondesteko minbiziaren baheketaren programak % 50 murriztu du hilkortasuna 50 eta 69 urtekoen artean, bi hamarkadatan.
2.200 bat emakumeri eraso die gizon bikotekideak edo bikotekide ohiak, Euskadin, 2026ko lehen seihilekoan
Emakunderen arabera, % 7 igo da 2025aren aldean. Familia barruko indarkeriaren biktimen kopurua % 20 hazi da Araban, eta erasoa jasan duten biktimen kopurua % 10 igo da Gipuzkoan.
Bi pertsona zauritu dira A-8an, trafiko-istripu batean, Muskiz parean, Kantabriarako noranzkoan
Istripua bi kilometroko auto-ilarak eragin ditu. Kantabriarako zirkulazioa 236. irteeratik bideratzen ari da.
Guardia zibil batek bikotekide ohia hil du Llanesen, hura ere agentea
Hilketaren ondoren, ihes egiten saiatu da erasotzailea, eta ahalegin horretan, inguruan zeuden beste agente batzuk tiroka erantzun diote. Bertan zendu da.
Lizarran hildako gizonaren bikotekide ohiak azaldu du indarkeria fisikoa eta psikologikoa pairatu zituela hainbat urtez
Gizona balkoi batetik erorita hil zen, Poliziarengandik ihesi zihoala, azken horiek indarkeria matxistagatik abisua jaso ondoren.
Donostiako Udalak eraso sexisten aurkako Aste Nagusirako kanpaina aktibatu du: puntu morea Boulevardean egongo da
Ane Oyarbide Berdintasun zinegotziak adierazi duenez, "elkarbizitza, errespetu eta askatasun gunea izan behar du Aste Nagusiak, pertsona guztientzat".