Gizon bati labanaz eraso egin eta larri zauritu da, Bilbon

Gizon bat larri zauritu da Bilbon, hainbat lagunek labanaz eraso egin ostean, Segurtasun Sailak eitb.eus-i jakinarazi dionez. Ertzaintzak lapurreta gisa abiatu du ikerketa, baina ez du hipotesi bat ere baztertzen.

Igande gauean hainbatetan deitu dute 112 telefono-zenbakira, 23:30 aldera, Santutxuko Jose Maria Lidon kalean gizon bat zauritua zegoela jakinarazteko.

Gizonaren deklarazioaren arabera, Zabalburu plazako kutxazain automatiko batean zegoela eraso egin diote; ondoren, ibilgailu batean sartu eta Lidon kalean utzi dute botata.

Ertzaintzak gertatutakoaren nondik norakoak argitzeko ikerketa abiatu du. Zauritutako gizona, berriz, larri eraman dute Gurutzetako Ospitalera.