Euskadiko garraio publikoan eskudirutan ordaintzea debekatuta dago

Euskadiko Garraio Publikoaren Erakundearteko Batzordeak erabaki du garraio publiko guztietan txanpon edo billete bidezko ordainketa indarrik gabe uztea, koronabirusaren pandemiaren aurkako prebentzio-neurri gisa. Erabiltzaileek, beraz, kreditu-txartelaren edo garraio-bonuen modalitate desberdinen bidez soilik ordaindu ahal izango dute.

Neurri hori, kutsadura saihesteko beste jarraibide batzuekin batera, ostiral honetan eztabaidatu dute Euskadiko Garraio Publikoaren Erakunde arteko Batzordeak egindako bileran. Gasteizen, neurri horiek gauerditik aurrera aplikatuko dira, Udaletik jakitera eman dutenez.

Eusko Jaurlaritzatik zehaztu dute nahitaez bete beharreko neurriak direla, baina nolabaiteko tartea utziko diotela operadore bakoitzari berari dagozkion neurriak aplikatzeko. Eskudirutan ordaintzeko debekuaz gain, garraio publikoko ibilgailuen lehen ilarako eserlekuak erabili gabe uztea erabaki dute.

Horretarako, eserlekuak ez erabiltzeko debekua zinta edo kartel bidez adieraziko da. Neurri horren bidez, gidariak kutsatzea saihestea lortu nahi dute. Bestalde, sarrera eta irteera erdiko edo atzeko ateetatik egitea adostu dute.

Berrantolaketa

Halaber, bidaia-txartela edo bonoa baliozkotuko da autobusen eta trenen erdiko aldean dauden makinetan. Zerbitzuak egoerara egokitzea ere erabaki dute, eta, hala, baliabideak optimizatzeko zerbitzuak bertan behera utziko dira.

Gasteizko hiri barruko autobusen kasuan, erabiltzaileen kopurua %45 eta %50 artean murriztu da, koronabirusaren hedapenaren ondorioz.

Autobus barruan metro bateko tartea gordetzea gomendatu die batzordeak zerbitzua erabili behar dutenei. Gainera, gidari bakoitzak bere postua desinfektatu beharko du zerbitzua amaitzen duenean.

Gasteizko kasuan, Euskotrenen garraioari buruzko informazio-bulegoa, Antso Jakitunaren kalean dagoena, itxi egingo da aurrez aurreko arretarako, baina telefono bidezko zerbitzua emango du. BAT txartelak tranbia-geltokietan edo autobus-geltokian dauden makinetan eskuratu ahalko dira.

Gainerako zerbitzuak, hala nola, txartel pertsonalizatua, telefonoz edo postaz izapidetuko dira. Galdutako objektuen zerbitzua Euskotrenek Ibaiondon duen bulegotik emango da.

Taxilariak babestu

Taxien kasuan, billeteekin eta txanponekin ez ordaintzea gomendatzen da, ordainketa telematikoa erabili ahal izanez gero –txartelarekin–.

Era berean, kontaktu intentsiboko guneetan (manillak, buruak edo segurtasun-uhala) garbiketa-neurriak indartzeko eskatu da.

Garraio publikoa koordinatzeko mahaia datorren astelehenean bilduko da, 09:00etan.