150 kasutik behera egin du intzidentziak Euskadin, eta arrisku ertainean sartu da

Euskadi Osakidetzaren kontingentzia-planaren 2. agertokira igaro da, 100.000 biztanleko 14 egunetan 150 kasutik behera egin ondoren, 146,52raino. Datu "itxaropentsuak" eta "normalizaziorako beste urrats bat" direla esan du Gotzone Sagardui Osasun sailburuak.

Asteroko Gobernu Kontseiluaren ostean egindako prentsaurrekoan Sagarduik azpimarratu duenez, Osakidetzaren kontingentzia planak aurreikusten dituen 5 egoeretatik 2.era pasatu da EAE, baina 60 kasuko tasatik "urrun" dagoela gaineratu du.

Horrenbestez, intzidentzia metatua 9 kasu baino gehiagotan jaitsi da bezperatik, eta 2020ko abuztuaren hasieratik izan ez diren datuak lortu ditu (abuztuaren 7an, 140,31).

Gipuzkoan 150 kasuko muga jaistea lortu dute, 137,13ko intzidentzia metatuarekin, Araba jada maila horren azpian baitzegoen, eta orain 135,97ra jaitsi da. Bizkaian, 150etik gora dago parametro hori; 152,04an. 

Adin-tarteen arabera, txertoaren eraginkortasuna agerikoa da jada immunizatuta dauden kolektiboetan; izan ere, 65 urtetik gorako biztanleen artean, 40,46 kasu daude 100.000 biztanleko 14 egunetan, eta 40-64 urtekoen artean, 140,83.

Pandemiaren bilakaerari buruzko gainerako adierazleei dagokienez, joera positiboa sendotu egin da, positibotasun tasa % 2tik behera baitago (% 1,8). Datu hori ez da 2020ko uztailaren 16tik lortu (% 1,2).

Astelehen honetan, 142 positibo berri erregistratu dituzte, bezperan baino 17 gehiago. 8.006 PCR eta antigeno-test egin, eta 20 positibo detektatu dituzte Araban, 83 Bizkaian, 35 Gipuzkoan eta lau Euskaditik kanpo bizi diren pertsonen artean.

EAEko ospitaleetan, 30 gaixo ospitaleratu dituzte azken orduetan (14 gehiago), eta 96 pertsona daude ospitaleratuta gela arruntetan (1 gutxiago). Gainera, 59 lagun daude zainketa intentsiboetako unitateetan, egun bat lehenago baino bat gutxiago.

Bestalde, R0 indizea egonkor mantendu da (0,85). Apur bat gora egin du Araban (0,94tik 0,96ra) eta Bizkaian (0,87tik 0,88ra), eta behera, berriz, Gipuzkoan (0,78tik 0,77ra).

Ortuella eta Zalla (Bizkaia) eta Azkoitia (Gipuzkoa) eremu gorrian daude oraindik, 400 kasutik gorako intzidentzia metatua baitute.

Hezkuntza sistemari dagokionez, 44 ikasgela itxi dituzte, bezpean baino lau gutxiago (% 31), eta 39 ikastetxe, astelehenean baino bat gehiago.

Murrizketen moderazioa

Transmisio moderatuko fasean sartzeak (60 eta 150 kasu artean), Bizi Berri III Planaren arabera, Euskadiko Babes Zibileko Planaren (LABI) Aholku Batzordeak maiatzaren 31n onartutako murrizketak leuntzea ekarriko luke, baina horretarako berriro bildu behar da. Aste honetan edo hurrengoaren hasieran egingo du, ziurrenik.

Fase berri horrek ostalaritzari eragiten dioten neurriak arintzea ekar lezake, bai ordutegiei, mahaiko mahaikideen kopuruari eta edukierei dagokienez, bai elkarte gastronomikoak berriro irekitzeari eta saltoki eta kirol-jardueretako edukiera handitzeari dagokienez. Dokumentuak gaueko aisialdiaren irekiera aztertzeko aukera ere ematen du.

Hala ere, Eusko Jaurlaritzak ez du covid-19aren aurkako neurri sanitarioak arintzea aurreikusi, harik eta pilatutako intzidentziak 150 kasutik behera jarraitzen duela baieztatu arte.

Sagarduik azaldu duenez, LABIren Aholku Batzordea ez dute deituko egun indarrean dauden neurriek 20 egun bete arte, eta, ondorioz, datorren astera arte ez da bilduko.

Bestalde, Osasun sailburuak baztertu egin du maskararen erabilera "berehala" lasaitzea, oraindik "zuhurtziaz" jokatu behar delako.

Sagarduik gogorarazi du ez dagoela "inolako erabakirik", besteak beste, Espainiako Gobernuak "Estatuko lege bat aldatu behar duelako erabaki hori hartu ahal izateko".