38 otso eraso gertatu ziren Bizkaian iaz

Bizkaiko Foru Aldundiak astelehen honetan esan du otsoa espezie babestua izateak "arazo handia" dakarkiola abeltzaintzari. Izan ere, 2022an, 38 eraso gertatu eta 54 animalia hil dira: 51 ardi, 2 behi eta ostruka bat.

Iraunkortasun eta Ingurune Naturala Zaintzeko Saileko ahaldun Amaia Antxustegik eman ditu datuok, agerraldian, Elkarrekin Podemos-IUk horrela eskatuta. Karrantza inguruan izandako erasoen berri izatea eskatu zion, hain zuzen ere, aipatu koalizioak.

Hantxe zehaztu du, guztira, 38 izan direla otsoek Bizkaian iaz egindako erasoak, horietatik 24 Karrantzan, 13 Gorbeian eta bakarra Urduñan.