Gaur irekiko dute lehenengo Harreragunea, Bilbon, migratzaileen harrera bideratzeko asmoz

Bilboko Udalak eta Eusko Jaurlaritzak martxan jarri duten lehen Harreraguneak gaur zabalduko ditu ateak. 

Nerea Melgosa Ongizate, Gazteria eta Erronka Demografikoko sailburuak eta Juan Mari Aburto Bizkaiko hiriburuko alkateak ostiralean aurkeztu zuten Colon de Larreategi kaleko 3. zenbakian dagoen lehenengo harreragunea, Zehar-Errefuxiatuekin elkarteak kudeatuko duena.

Bulegoaren helburua Bilbo migratzeko aukeratzen dutenei orientazioa, laguntza eta baliabide erabilgarriak ematea da. Zehazki, zerbitzu berriaren egoitzara joaten diren pertsonak erantzun "pertsonalizatua" jasoko dute, besteak beste, erroldatzea, atzerritartasun-izapideak, osasun-txartelak, adingabeak eskolatzea, hizkuntza ofizialak eta beste hizkuntza batzuk ikastea eta lan-orientazioarekin zerikusia duten gaien inguruan.

Bestalde, Nerea Melgosak azpimarratu du proiektu pilotu honen jarraipena egingo dutela beste udalerri batzuetan ezartzea aztertzeko. Hasiera batean, Euskal Autonomia Erkidegoko beste bi hiriburuetan eta 20.000 biztanletik gorako udalerrietan antzeko bulegoak irekitzeko asmoa dute erakundeek.

Zerbitzu berria, erakunde bultzatzaileek gogorarazi dutenez, "lankidetza estuan" arituko da harrera eta kulturen arteko bizikidetza programak garatzen urteak daramatzaten gizarte eragileen sare zabalarekin. Bulegoak zortzi langile izango ditu.

Bilbotarren % 17 atzerritar jatorrikoak dira

Bilboko Immigrazioaren Tokiko Behatokiak emandako datuen arabera, dagoeneko, bilbotarren % 17,3k jatorri atzerritarra du, eta zenbaki absolutuetan 60.000 pertsona baino gehiago dira.

Herrian erroldatutako etorkinen % 60,4 latinoamerikarrak dira, baina "marokoar, txinatar, errumaniar edo senegaldarren presentzia handia dago", Udalaren arabera.

Halaber, 2022tik, covid-19ak sortutako osasun krisia amaitu ondoren, migrazio-fluxuak berriro hazi dira, Bilboko kasuan "8.974 pertsona".