Nafarroako Gobernuak adierazpen instituzionala egin du, hildako bost agenteen heriotzagatik samina agertzeko 

Asteazken honetan AP-8an Elgoibar parean izandako istripu larrian hildako bost foruzainen omenezko ekitaldi istituzionala prestatzen ari da Nafarroako Gobernua. Hala iragarri du Javier Remirez Nafarroako Gobernuko lehen presidenteorde eta bozeramaileak, ezbeharraren aurrean "atsekabetuta" dagoela esan ostean.

Halaber, arratsaldean egin duen ezohiko bilkuran, adierazpen instituzionala onartu du Foru Gobernuak. Testuan, "bere min sakona" adierazi eta  "doluminak, babesa eta maitasuna helarazi" dizkie hildako polizien senideei, lagunei eta lankideei. 

"Herritarrak babesten eta zaintzen aritu diren zerbitzu publikoko bost langile galdu ditugu. Gure errespetua eta esker ona, izandako konpromisoagatik eta zerbitzurako bokazioagatik", dio adierazpenak. 

Azkenik, azken orduotan jasotako elkartasun mezu guztiak eskertu ditu Gobernuak. "Horiek guztiek aitortzen dute bost hildakoen lana, eta foruzain guztiena, orokorrean." 

Pradales eta Chivite, atsekabeturik

Gertatutakoaren berri izan eta bereahala, erakundeen eta politikarien mezuen erreskada etorri da. Imanol Pradales lehendakaria eta Maria Chivite Nafarroako Gobernuko presidentea, biak ala biak, atsekabeturik agertu dira gertatutakoaren aurrean.  

Sare sozialetan zabaldutako mezu batean, Pradalesek, hunkituta, esan du gaurkoa "egun beltza" dela euskal errepideetan, eta "tristura, amorrua eta ezintasuna" sentitu dituela aitortu du. Era berean, Nafarroako Gobernuko presidenteak bere mina adierazi du foru erkidegokoak ziren biktimen heriotzagatik: "Atsekabetuta nago Foruzaingoko bost agente hil diren istripu ikaragarriagatik", adierazi du Chivitek.

Talde politiko guztien elkartasun mezuak

Cristina Ibarrola UPNren presidentea "penatuta" agertu da, eta "maitasuna" eta "doluminik zintzoenak" helarazi dizkie hildakoen "familia, lagun eta lankideei". Doluminak helarazi dizkie, baita ere, Laura Aznal EH Bilduk Nafarroako Parlamentuan duen bozeramaileak istripuan hildakoen senide eta lagunei. 

Geroa Baik ere elkartasuna helarazi die hildakoen senideei eta lagunei, eta Zurekin Nafarroak adierazi du Nafarroa osoa goibel dagoela gaur.

Samina Foruzaingoan

Foruzaingoak "samin sakona" eta "tristura" adierazi ditu taldeko bost kideen heriotzagatik, eta "hutsune handia" utzi dutela esan dute. Era berean, Ertzaintza une oro laguntza eman izana eskertu dute. 

Ertzaintzak eta Eusko Jaurlaritzako Segurtasun Sailak, bere aldetik, elkartasuna adierazi diete hildakoen familiei, Nafarroako Foruzaingoari eta Nafarroako Gobernuari, eta Segurtasun sailburu Bingen Zupiriak doluminak helarazi dizkio Nafarroako Gobernuko Barne, Funtzio Publiko eta Justiziako kontseilari Inmaculada Juriori.

Sanchezek, "babesa eta elkartasuna"

Espainiatik ere iritsi dira elkartasun mezuak. Pedro Sanchez Espainiako Gobernuko presidenteak samina agertu du bost agenteen heriotzagatik, eta elkartasuna helarazi die haien gertukoei. 

"Gure babes eta elkartasuna, Espainiako Gobernuaren izenean, familiei, lankideei eta gertukoei, une latz hauetan", idatzi du sare sozialetan. 

Bide beretik, Espainiako Errege-etxeak doluminak igorri ditu eta Nafarroako gizarte osoari elkartasuna azaldu dio.

ELAk "ikerketa zorrotza" eskatu du