Espainiak eskatutakoari entzungor eginez, Schengen berrezartzeari ezetz esan dio Italiak

Italiako Gobernuak Espainiarekiko etenda mantenduko du Shengen akordioa, eta herrialde horretatik jasotzen dituen bidaiariei kontrolak egiten jarraituko du, abuztuaren 15era arte behintzat. Ohartarazi duenez, "segurtasun nazionalaren eta mugen kontrolen aferan, ez dugu atzerriko ultimatum edo inposiziorik onartzen".  

Meloniren gobernuaren arabera, akordioaren etena "EBko tratatuetan onartutako behin-behineko neurria da. Abuztuaren 15etik aurrera aztertuko dugu berriro egoera". 

Giorgia Meloni Italiako lehen ministroaren bulegoak kaleratutako oharrak dio "arrisku terrorista" ikusita hartu dutela neurria. Azaldu duenez, "segurtasuneko arriskuak eta arrisku terroristak ez daudela bermatu arte, Europara sartu nahian migratzaile olderik ez dagoela egiaztatu arte, ez dugu egoera berriro aztertuko". 

Dena dela, Italiaren hitzetan, neurri horrek "ez dio Espainiako herrialde lagunarekin duen harremanari kalte egiten", eta Madrilekin "elkarrizketa eraikitzailea" izateko prest azaldu da. 

Igandera arteko epea, Espainiak

Aurrez, Espainiako Gobernuak galdea egin dio Schengen akordioa berriro ezartzeko eta mugetan kontrolak egiteari uzteko. Igandera arteko tartea eman dio, eta, erantsi duenez, hori egin ezean, "Espainiak neurri proportzionalak hartuko ditu bere interesak eta herritarron duintasuna babesteko”.

Ceutako migrazio krisia lehertu eta gutxira, abuztuaren 1ean, Italiako Gobernua mugetan kontrolak jartzen hasi zen, Europar Batasuneko Schengen akordioa bertan behera utzita. Jarrera aldatzeko eskatu dio Espainiak, eta “Espainiako herritarrak gainerako europarren pare tratatzeko”. Horrek, Moncloaren hitzetan, “milaka bidaiariren mugikortasunari egin dio kalte, eta ziurgabetasun juridikoa sortu du uda opor betean”.

Moncloaren esanetan, “azken urteotan aurrekaririk ez duen neurria” da Italiak hartutakoa. Espainiako Gobernuaren ustez, Italiak aurrez abisua eman barik, alde bakarrez eta argudio faltsuak erabilita hartu zuen erabakia.

Hori horrela, argi utzi nahi izan du Ceutara modu irregularrean sartu ziren migratzaileak ez zirela Schengen eremuan sartu, ezta sartuko ere (Ceutak erregimen berezia du). Gainera, nabarmendu du Marokotik hiri autonomora sartu ziren gehienak Marokora itzuli direla, eta Italia dela, Frontex agentziaren arabera, azken urteotan sarrera irregular gehien izan dituen estatua (Espainiak halako bi jaso ditu). Are gehiago, Espainiako Gobernuak gogora ekarri duenez, 2022tik Italiak ez du Dublingo Akordioa betetzen, eta urraketa horrek gainerako estatu kideei aparteko presioa eragin die.

Horrenbestez, Sanchezen gobernuaren aburuz, Italiaren erabakia bidegabea, Europar Batasunaren interesen kontrakoa eta Espainiako herritarrekiko baztertzailea da.  

Adingabeen banaketa erkidegoen artean

Bestalde, Sira Rego Espainiako Gazteria eta Haurtzaro ministroak iragarri du Ceutara heldutako 1.342 adingabeak “datozen asteotan” birkokatuko dituztela.

Prentsaurrekoan azaldu duenez, adingabe horiek “modu solidario eta nahitaezkoan” hartzeko diru partida prestatu dute erkidegoentzat. Haurtzaroaren sektore arteko batzordea deituko dute datorren astean, eta konferentzia, abuztuaren amaierarako. "Diru partida hori lehenbailehen aktibatu nahi dugu, erkidegoen arteko banaketa egin ahal izateko”, adierazi du.

Hain justu, Eusko Jaurlaritzak asteon eskatu dio Espainiako Gobernuari “agortu dezala adingabe horiek euren familien artera itzultzeko bide administratiboa”. Gainera, Nerea Melgosa Eusko Jaurlaritzako Ongizate, Gazteria eta Erronka Demografikoko sailburuak adierazi du EAEk bere baliabideak “gainezka” dituela eta balizko lekualdatze bat aurrez Jaurlaritzarekin adostu beharko litzatekeela.