Europako liderrek Ukrainarako bake plana lantzen jarraitu dute, eta AEBren "beharrezko" babesa bilatuko dute

Keir Starmer Erresuma Batuko lehen ministroak, igande honetan Londresen bildu diren Europako buruzagien anfitrioiak, herrialdeen koalizio bat iragarri du Ukrainako gerrari amaiera emateko eta bakea bermatzeko.

"Ukrainako gerrari amaiera emango dion akordio bat defendatzeko eta bakearen bermatzaile izateko prest dauden (herrialdeen) koalizio bat garatuko dugu", azaldu du Starmerrek prentsaurrekoan.

Gainera, Ukrainarekiko laguntza militarra mantentzea eta Errusiaren gaineko presio ekonomikoa handitzea adostu dute, baita Ukrainaren subiranotasuna eta segurtasuna defendatzea ere. Halaber, Ukrainak bere herrialdearen bakea negoziatzen den edozein mahaitan ordezkatuta egon behar dela azpimarratu dute, eta horren alde egingo dutela iragarri.

Bake akordio baten kasuan, Europako liderrak Errusiak Ukrainan egin dezakeen edozein inbasio saihesten saiatuko dira. 

Keir Starmerrek iragarri du, bestalde, Erresuma Batuak laguntza finantzarioa emango diola Ukrainari aireko defentsarako 5.000 misil baino gehiago erosi ahal izateko.

"Herrialde guztiek ezingo dute lagundu, baina horrek ez du esan nahi ezer egin gabe geratuko garenik", argudiatu du Starmerrek. Aitzitik, "prest daudenek planak areagotuko dituzte berehala, presazko neurriak hartuz".

"Erresuma Batua prest dago asmo hauek  babesteko soldaduak eta hegazkinak jarriz, besteak beste", azaldu du.

Starmerrek ziurtatu du "hainbat herrialde" daudela ekimen honetan parte hartzeko prest. "Prestatzen ari garen planaren parte izan nahi dutela adierazi dute gaur hainbat herrialdek. Bakoitzak esango du, ordea, ekarpen zehatza nola egin nahi duen".

"Kritikarik gabe eta errespetutik onartzen dut modu horretan lagundu nahi dutela sentitzen ez duten beste herrialde batzuen jarrera, baina, norbaitek aurrera egin ezean,  puntu honetan harrapatuta geratuko gara eta ezingo dugu aurrera egin", argudiatu du.

Starmerren hitzetan, Erresuma Batuak "aurrerapauso bat emango du eta prest dago ekimen hau gidatzeko". "Nazio gisa, lehen ere egin izan dugu historian zehar, eta orain berriro egingo dugu".

Besteak beste, Erresuma Batua eta Frantzia lantzen ari diren plana Europako buruzagiei aurkezteko balio izan du gaurko bilerak, ondoren plan hori AEBri aurkezteko: "Gaurko bileraren helburua aliatu europarrak asmo honen bueltan batzea zen. Gure abiapuntua Ukraina ahalik eta posizio indartsuenean jartzea izan behar da, edozein akordio indarrez babestuta egon behar delako".

"Gure kontinentean bakea babesteko eta bake horrek arrakasta izateko, Europak lan gogorra egin beharko du, baina beharrezkoa da ahalegin horrek AEBren babesa edukitzea", esan du. 

"AEBrekin lanean ari gara puntu honetan, Donald Trump presidentearekin joan den astean izan nuen bileraren ondoren, eta argi esango dizuet: ados gaude presidentearekin bake iraunkorra lortzeko premia dagoela; orain elkarrekin lortu behar dugu", azpimarratu du.

"Azkenik, buruzagiok laster berriro biltzea adostu dugu, ekintzen erritmoari eusteko eta partekatutako plan hori gauzatzeko lanean jarraitzeko", berretsi du.

"Historiaren bidegurutze batean gaude. Ez da hizketarako garaia, ekiteko garaia da. Ordua da aurrerapauso bat eman eta bake justu eta iraunkorrerako plan berri baten inguruan gidaritza hartu eta bat egiteko", nabarmendu du lehen ministroak.

Von der Leyen, berrarmatzearen alde

Ursula von der Leyen Europako Batzordeko presidenteak Ukraina eta Europa "lehenbailehen" berrarmatzeko beharra azpimarratu du igande honetan Londresen. "Ukraina eta Europa berrarmatu behar ditugu", adierazi du Von der Leyenek prentsaurrekoan, Keir Starmer Erresuma Batuko lehen ministroak deitutako hitzorduaren amaieran.