AEBk kritikatu du Estatu palestinarra onartzeko Macronen erabakia

Emmanuel Macron Frantziako presidenteak NBEren hurrengo Batzar Nagusian Palestinako Estatua ofizialki onartzeko hartutako erabakiak erreakzio gogorra eragin du AEBren aldetik, eta israeldarren eta palestinarren arteko zuzeneko akordiorik gabeko aldebakarreko edozein onarpenen aurka agertu da.

Estatu Departamentutik, Matthew Miller bozeramaileak azpimarratu du Washingtonek uste duela konponbide iraunkor bat bakarrik lor daitekeela "aldeen arteko negoziazioen bidez". Gaineratu du, Frantziak bezala hartutako erabakiek "are gehiago zaildu lezakete bakerako bidea, eta konponbide diplomatikoarekin konprometituta ez dauden eragileak indartu".

Estatu Batuak, Israelekin batera, historikoki Palestina estatu independente gisa nazioartean onartzearen aurka agertu dira. Jarrera horrek gero eta tirabira handiagoak sortu ditu.

Frantziak mapa diplomatikoak berreratzen jarraitzen du, eta Palestina onartzen duten 140 herrialde baino gehiagori batu zaio. Gobernu batzuek justiziarako eta bakerako pausotzat jotzen dute erabakia, eta beste batzuek, aldiz, egonkortasunerako mehatxu zuzentzat eta gatazka konpontzeko oztopotzat.

Israel: "Terrorismoarentzako saria"

Gideon Saar Israelgo Atzerri ministroak Macronen erabakia "Hamasentzat eta urriaren 7ko terrorismoarentzat saria" dela esan du, 2023an talde islamistak egindako erasoak aipatuz.

Saarrek ohartarazi du Frantziaren keinua "Israelen segurtasunaren aurkako mehatxu zuzena" dela, eta "gerra luzatu, negoziazioak zaildu eta Palestinako herriaren sufrimendua areagotu" dezakeela. Isaac Herzog Israelgo presidentea ere kontra agertu da, eta neurriak "ez duela bakea sustatuko eta ez duela terrorismoa garaitzen lagunduko" adierazi du.

Hamas: "Aurrerapen politikoa"

Hamasek Frantziaren iragarpena txalotu du, eta "norabide egokian hartutako neurri positibotzat" jo du.

"Frantziaren aitortza Israelen okupazioak narratiba globala manipulatzeko izan duen porrotaren isla da", adierazi du ohar batean.

Espainia: "Urrats bat bakerako bidean"

Pedro Sanchez Espainiako Gobernuko presidenteak Macronen erabakia txalotu du, eta "bake justu eta iraunkorra lortzeko urrats garrantzitsutzat" jo du. Espainiak hilabete batzuk lehenago onartu zuen Palestina, Europako beste herrialde batzuekin koordinatuta, hala nola Irlandarekin eta Norvegiarekin.

Sanchezek berretsi du bi estatuen arteko konponbidearen alde dagoela, eta defendatu du aitortza ez dela oztopo bakearentzat, baizik eta hori lortzeko tresna bat.

Erresuma Batua: “Larrialdi humanitarioan arreta jartzea da garrantzitsuena”

Erresuma Batuko agintariek oraingoz ez dute Palestina estatu gisa onartu nahi, uste baitute oraindik ez direla beharrezko baldintzak betetzen, eta lehenik eta behin Gazako zerrendako krisi humanitario larria konpondu behar dela.

Peter Kyle Erresuma Batuko Estatu idazkariak adierazi duenez, Palestinako Estatua aitortzea Erresuma Batuko Gobernuaren "konpromiso argia" bada ere, "arreta Gazako Zerrendan dagoen larrialdi humanitarioan jartzea da garrantzitsuena orain", herritarren gosetea gero eta handiagoa baita.

Alemania: "Israelen segurtasunak garrantzi handiagoa du"

Alemaniako Gobernuak, halaber, baztertu egin du Palestinako Estatu bat epe laburrean aitortzea, bi Estaturen konponbiderako urrats hori prozesuaren amaieran egin behar dela iritzita.

Stefan Kornelius Alemaniako Gobernuko bozeramaileak ohar batean azpimarratu duenez, Alemaniako Gobernuak "ez du epe laburrean Palestinako Estatua onartzeko asmorik". Ildo horretatik, azpimarratu du Alemaniarentzat "Israelen segurtasunak garrantzi handiagoa" duela, eta berretsi du Exekutiboa ziur dela "bi Estaturen irtenbide negoziatu batek soilik ekarriko diela bake eta segurtasun iraunkorra israeldarrei eta palestinarrei".

Txina: "Bide errealista bakarra"

Pekinek ere babestu du Macronek Nazio Batuen Erakundean artuko duen erabakia. Estaturen konponbidea gatazka konpontzeko "bide errealista bakarra" dela esan du.

"Palestinako auzia Ekialde Ertaineko arazoaren muinean dago", adierazi du Guo Jiakun Atzerri Ministerioko bozeramaileak.

Australia: "Berehalako su-etena"

Anthony Albanese Australiako lehen ministroa kezkatuta agertu da Gazako egoera humanitario larriagatik, "munduko beldur txarrenak gainditu dituelako".

Estatu palestinarraren berehalako errekonozimendurik baieztatu ez duen arren, Albanesek adierazi du Australiak "berehalako su-eten iraunkorra" babesten duela eta bi estatuen konponbidea "irmo" defendatzen duela.