40 lagun artatu dituzte beroagatik EAEn, larriena Galipa Mendi Birako parte-hartzaile bat

Ertzaintzaren helikoptero batek Galipa Mendi Birako korrikalari bat erreskatatu behar izan du igande honetan Santurtziko Serantes mendian, bero-kolpeagatik. Beste bi parte-hartzaile ere artatu behar izan dituzte Larrialdi Zerbitzuek baina tokian bertan, ez dituzte ospitalera eraman behar izan.

Eusko Jaurlaritzako Segurtasun Sailak jakinarazi duenez, abisua igande honetako 13:00ak baino minutu batzuk lehenago jaso dute, Santurtziko Serantes mendian egiten ari diren Galipa Mendi Birako antolatzaileek jakinarazi dietenean korrikalari bat ondoezik zegoela tenperatura altuak direla eta.

Suhiltzaileak, Osakidetza eta Ertzaintza bertaratu dira, eta hasiera batean bertan artatu dute 30 urteko gizona baina gero, helikoptero batean eraman dute ospitalera.

Probako beste bi partaide ere ondoezik sentitzen hasi dira, eta bertan artatu dituzte.

Hiru pertsona horiek kontuan hartuta, 40 lagun artatu dituzte gaur Larrialdi Zerbitzuek beroa dela eta.

30 eta 94 urte artean zituzten laguntza behar izan dutenak. 18 tokian bertan artatau dituzte eta 22 ospitalera eraman dituzte. Guztiak arin, Serantesen erreskatatutako gizona izan ezik.

Bero handiko bigarren eguna jarraian

Beroak jarraipena izan du igande honetan Euskal Herri osoan, eta tenperatura maximoak 30 ºC-tik gorakoak izan dira udalerri gehienetan, bigarren egunez jarraian, Euskalmetek jakitera eman duenez. 

Hala, udako giroa nagusitu da lehen orduetatik. Ipar-mendebaldeko zenbait tokitan termometroak 2-3 ºC jaitsi ditu baina gainerakoan ia ez da aldaketarik izan.

Gau tropikala

Bizkaiko eta Gipuzkoako zenbait udalerritan, 20 ºC-tik gorako tenperaturak izan dituzte goizaldean, eta Lezon (Gipuzkoa) neurtu dute beroena: 25,1 ºC.

Euskalmeteko estazio meteorologikoetan jasotako datuen arabera, goizaldean bero handia egin du Bizkaiko hainbat lekutan, eta minimoak 20 ºC-tik gorakoak izan dira Orozkon (22,9 ºC), Oizen (22,3 ºC), Bermeon (22 ºC), Balmasedan (22 ºC), Urduñan (20,9 ºC), Getxon (20,5 ºC) eta Bilbon (20,2 ºC).

Gipuzkoan, tenperatura altuenak Lezon (25,1 ºC) eta Zarautzen (22 ºC) izan dira goizaldean.

Araban, berriz, Paganosen bakarrik iritsi dira 20 ºC-ra, eta Euskadi osoko minimoa Urizaharran neurtu dute, termometroak 8,6 ºC-ra jaitsi baitira bertan.

Datorren astean

Astelehenean, tenperatura maximoak jaitsi egingo dira, baina udako giroarekin jarraituko dugu. Zerua lainotuta ikusiko dugu tarteka, erdi-mailako hodeiak eta goi-hodeiak nagusituko baitira. Arratsaldean, bero-hodeiak garatuko dira eta baliteke zaparrada trumoitsuak botatzea, bereziki hegoaldean. Horrez gain, gauean behe-hodeiak sor daitezke kostaldean. Mendebaldeko eta ipar-mendebaldeko haizea ibiliko da, eta egunaren bigarren partean iparraldekoa izango da nagusi barnealdean.

Maximoak 24 ºC-koak izango dira Donostian, eta 31 ºC-koak Arrasaten. Bilbon 28 ºC  neurtuko dira, eta Gasteizen, Guardian eta Iruñean, 30 ºC  inguru. Kostaldean, mendebaldeko eta ipar-mendebaldeko haizea ibiliko da, eta barnealdean iparraldekoa nagusituko da arratsaldean.

Asteartean, uda giroan murgilduta jarraituko dugu: pixka bat jaitsiko da tenperatura kostaldean, baina igo egingo da hegoaldean. Giro eguzkitsua izango da, behe-hodei batzuekin kostaldean goizean goiz eta bero-hodei batzuekin barnealdean arratsaldean; zaparrada trumoitsuak botatzeko probabilitatea txikia da. Mendebaldeko haizea ibiliko da kostaldean, eta iparraldekoa barnealdean.