IZARO Lekeitiora itzuliko da, "Nora"ren eskutik

IZARO musikariaren eta "Nora" pelikularen bideek bat egingo dute berriz Lekeition, uztailaren 3an, larunbatarekin.

"Libre", "Invierno a la vista", "Paris" eta beste hainbat kantu arrakastatsuren egileak kontzertua eskainiko du egun horretan Bizkaiko udalerriko Abaroa jauregian, 20:00etatik aurrera, eta "Nora" pelikularako berariaz konposatu zuen kantua estreinatuko du bertan, nola zuzenean, gaueko kantuen zerrendan sartuta, hala pantailan, Marina Palaciok kantu horretarako grabatu duen bideoklipa estreinakoz erakutsita.

Han izango dira, gainera, Lara Izagirre filmaren zuzendaria, Ane Pikaza zinemetan irailaren 3an estreinatuko den road trip argitsuaren protagonista eta Amaia Aberasturi, filmean parte hartzen duen aktorea.

IZAROk azaldu digunez, kontzertu akustikoa izango da larunbatekoa: "Garazi, Iker eta hirurok joango gara. Lehen aldia izango da 'Nora' abestia jotzen duguna gure setlist akustikoaren barruan, eta, egia esan, oso gogotsu gaude kantua gure kantutegian sartu eta berataz gozatzeko".

Gainera, musikariak zirkulua itxiko du nolabait "Nora" filmarekin, non eta Lekeition bertan. Izan ere, mallabitar musikariaren kontzertu bat da, hain zuzen, iaz Donostiako Zinemaldian erakutsi zen filmaren lokalizazioetako bat: Ane Pikazaren pertsonaiak bere buruaren bila egiten duen bidaiako pasarte bat IZAROren emanaldi batean girotuta dago.

"Lekeition grabatu genuen pelikula ere; beraz, hasiera polita da guretzat", azaldu digu. "Superpozik gaude pelikularen estreina gero eta gertuago ikusteaz, urte zaila izan da filmarentzat eta bertan lan egin dutenentzat ere, eta pozgarria da martxa polita hartu duela ikustea". 

Lara Izagirre "Nora"ren zuzendariak azaldu digunez, kontzertua filmatu zenekoa errodajeko gau berezienetakoa izan zen: "Nire urtebetetzearen biharamuna zen, eta hori ospatzeko modu bikaina zen kontzertua. Ekin! esan genuenean, zoragarria izan zen IZARO eta taldea kantua jotzen entzutea, publikoaren laguntzarekin".

Orduan filmatu zuten, halaber, larunbateko kontzertuan estreinatuko duten bideoklipa, Marina Palacioren zuzendaritzapean. "Pelikularako materiala grabatu eta gero, beste ordubetez gelditu ginen bideokliperako materiala jasotzen. Uste dut atariko ona dela IZAROren kontzertu baterako edo Nora-ren emanaldi baterako", esan digu Izagirrek.

"Nora" kantua

Lekeitio agertoki nagusi izan duen harreman hau, baina, Donostian jaio zen, "Nora" filmatzen hasi baino hilabete batzuk lehenago: "Lara eta bere bi lankiderekin gelditu nintzen goiz eguzkitsu batean Donostian gosaltzeko. Bertan kontatu zidaten pelikula nola jaio zen, nondik zetorren, nondik eraldatu zen, zergatik eta nora. Nora", azaldu digu IZAROk.

Erabateko konexioa izan zen bi sortzaileen artekoa: "Prozesu horretan haurrak izan zituen Larak, erditu berri zegoen nirekin gelditu zenean eta mahai hartan hain ondo ulertu nuen pelikulan kontatu nahi zutena, eta hain ondo ulertu nuen beraien lan egiteko modua, beraien filosofia, hain ondo ulertu nuen beraien pasioa, eta amatasuna eta lana eta kontziliazioa eta libre izatearen gatazka eta kanporako zaintza eternala eta (barka binomioa) gizonentzat egindako mundu baten emakume izatea eta bizitza eta adina eta dena". 

Baiezkoa eman zion IZAROk pelikularako kantua idazteko proposamenari, eta berehala hasi zen sortzen, "ikusi berria nuen paisaia hari erantzunez. Bizikletaz itzuli nintzen etxera, eta esaldi bat jaio zitzaidan indartsu: ez dezatela esan maite ez nintzenik". 

Baina gatazkatsua izan ote zen, nork bere buruari jarritako mugez haraindi askatasunez sortzera ohitutako artista batentzat, enkarguzko zerbait sortzea? Argi du IZAROk: "Egia esan, uste baino errazagoa izan zen. Hasiera baten pentsa dezakezu muga batzuk planteatzen zaizkizula kantua sortzeko, baina ez du zertan horrela izan".

"Zirrara eta energia"

IZAROk, "Nora" filmaren unibertsoak eta Lekeitiok bat egingo dute, beraz, larunbatean, 20:00etatik aurrera, ostera ere. Kontzertua perfektua izango ote den galdetu diogu IZAROri, baina errealitateak, ia beti bezala, letra larriko esaldia hondatu digu: "Kontzertu perfektua ez dakit existitzen den, denak dira hain ezberdinak, denetara heltzen zara zu hain ezberdin. Benetako gauzak gertatzen diren kontzertuak maite ditut nik, eta perfekzioa ez dut uste oso benetakoa denik. Kontzertuetan sortzen den zirrara eta energia, hori da estimatzen dudana".

Jarraituko dugu, bada, hitzez, musikaz eta irudiez perfekzioaren bila, aurrera bultzatuko gaituzten gauza inperfektuak sortzeko bada ere.