Hauteskundeak apirilaren 5erako deitzea aztertzen ari da lehendakaria

Iñigo Urkullu lehendakaria Euskal Autonomia Erkidegoko (EAE) hauteskundeak aurreratzea aztertzen ari da, eta, EiTBk jakin ahal izan duenez, data bat du mahai gainean: apirilaren 5a. Berez, irailean edo urrian egin beharko lirateke bozak, baina, legearen arabera, lehendakariari dagokio horiek aurreratzeko erabakia hartzea, bai eta data zehaztea.

Agintariak ostiral honetan bertan iragar lezake ofizialki hauteskundeen data, Eusko Legebiltzarrean. Izan ere, Elkarrekin Podemosek hauteskunde aurrerapenari buruz galdetuko dio bertan.

Atzo bertan, modu ofizialean aztertu zuten gaia Jaurlaritzaren Gobernu Bileran, eta sailburuek hauteskunde autonomikoen data aurreratzeari buruz zuten iritzia eman zuten. Hausnarketa horien edukia ez da ezagutzera eman Gobernu Bileran lantzen direnak "sekretuak" baitira.

EAEko Gobernuaren Legeak 50. artikuluak jasotzen duenez, "lehendakariak, bere erantzukizunpean eta Gobernuak eztabaidatu ondoren, Legebiltzarra desegin ahal izango du". Ganbera desegiteko dekretuak, Jaurlaritzari buruzko lege horren 51. artikuluan adierazten duen bezala, hauteskundeen deialdia eta egiteko eguna jaso beharko du.

Araudiaren arabera, hauteskunde eguna baino 54 egun lehenago desegin behar da Legebiltzarra. Beraz, datak aztertuta, apirilaren 5a litzateke horretarako erabil daitekeen lehen igandea.

PPk ez beste gainerako alderdiek izendatu dute lehendakarigaia, edo hautagaia aukeratzeko bidean daude. Iñigo Urkullu hirugarren aldiz aurkeztuko da lehendakarigai gisa EAJren izenean. Maddalen Iriarte izango da EH Bilduren hautagaia, eta Idoia Mendia, PSE-EErena. Podemos Euskadik laster —otsailaren 27tik martxoaren 2ra— egingo ditu lehendakarigaia aukeratzeko barne hauteskundeak, eta, gutxienez, bi hautagai izango dira: Rosa Martinez eta Miren Gorrotxategi. Euskadiko PPk ez du oraindik lehendakarigaia izendatu.

Urkullu: "Apirilaren 5etik urriaren 25erakoa da epea"

Bere aldetik, agintariak ez du bere planen berri eman nahi izan oraingoz, eta hauteskundeak egiteko epea “apirilaren 5etik urriaren 25erakoa” dela.

Urkulluren hitzetan, atzo “hausnarketak eta ekarpenak” jarri zituzten mahai gainean Gobernu bileran, eta hauteskundeak aurreratu edo ez erabakitzeko “hainbat faktore” aztertu zituztela azaldu du. Nolanahi ere, bozak izan arte Exekutiboak “normaltasun osoz” jarraituko duela nabarmendu du.

Horren ildotik, lehendakariak esan du Euskadirentzako erabaki “onena” hartuko duela. “Euskadiren interesa dut buruan, eta hauteskundeen data gardentasun osoz iragarriko dut”, gaineratu du.

Erreakzioak

Maddalen Iriarte EH Bilduko lehendakarigaiak uste du lehendakariak legegintzaldi amaiera "deserosoa" saihestu nahi duela hauteskundeak aurreratuta. Iriarteren esanetan, Jaurlaritzaren beraren eta EAJren kudeaketan "irregulartasunak" azaleratu diren honetan hartu du erabakia. Osakidetzaren lan eskaintza publikoaren hainbat azterketatan izandako filtrazioak edota De Miguel auzia aipatu ditu adibide gisa.

Bestalde, Lander Martinez Elkarrekin Podemosek Legebiltzarrean duen bozeramaileak nabarmendu duenez, bozak aurreratuta legegintzaldi honen "porrota" aitortuko luke lehendakariak. Martinezen iritzian, "onartutako lege kopurua oso eskasa izan da". Koalizio morean ez dute ulertzen, Martinezen esanetan, zer dela-eta dagoen "horrenbeste presa" bozak deitzeko. "Legebiltzarrean gai asko daude mahai gainean", esan du. 

Amaya Fernandez Euskadiko PPko idazkari nagusiaren hitzetan, lehendakariak "beldurragatik" aurreratu nahi ditu hauteskundeak, euskal ekonomia "okerrera" egiten ari delako. 

Azkenik, Jaurlaritza osatzen duten bi alderdiek, EAJk eta PSE-EEk, garrantzia kendu diote aurreratzeari. Iñigo Iturrate legebiltzarkide jeltzaleak azpimarratu duenez, EAEn "egonkortasun instituzionala izan du ia lau urtez. Lehendakariak, edozer erabakitzen duela ere, herri honen ongizatea izango du buruan".

Bestalde, Jose Antonio Pastor PSE-EEko bozeramaileak adierazi du sozialistak prest daudela bozetarako. Horren ustez, "datak ez du aparteko garrantzirik. Garrantzitsuena egonkortasun politikoa ereiten jarraitzea da".

Albiste honi buruzko informazioa ETB, Euskadi Irratia, Radio Euskadi, Radio Vitoriako albistegietan eguneratuko da, baita eitb.eus-en ere.