EAJk eta PSEk EAEko hiriburuak eskuratu dituzte, baina EH Bilduk ditu Alkatetza kopuru gehien

Larunbat honetan izandako EAEko udalen osaketaren ostean, EAEko hiru Alkatetzak EAJren eta PSE-EEren esku geratu dira, baina Alkatetza kopuruari dagokionez, EH Bildu lehenengo indarra da. Izan ere, guztira 107 Alkatetza ditu: 15 Araban, 41 Bizkaian eta 51 Gipuzkoan. EAJ bigarrena litzateke, 92 Alkatetzekin (Trebiñun kokatutako biak barne).

EAEko hiriburuetan, berriz, EAJk eutsi die Bilboko eta Donostiako Alkatetzei, eta Gasteizkoa PSE-EErentzat izan da. Juan Mari Aburto (Bilbo) eta Eneko Goiarentzat (Donostia) euren hirugarren agintaldia izango da, eta PSE estreinatu da Gasteizen, emakumezko den lehenengo alkatearekin: Maider Etxebarria.

Alkatetzen banaketa, lurraldeka

GIPUZKOA

EH Bilduk bere Alkatetza nagusiak mantendu ditu, eta Pasaia, Andoain, Arrasate edo Tolosa bezalako udalerri garrantzitsuak ere bereganatu ditu.

BIZKAIA

Tokiko plataformak funtsezkoak izan dira, sarritan, EH Bildurekin elkartu direlako aginte-makila hartzeko, esaterako, Zallan edo Gatikan.

ARABA

Egoera bera bizi dute Arabako zenbait udalerritan. Laudion, adibidez, EH Bilduko Ainize Gataska alkate izendatu dute Omnia herri-plataformaren bozei esker.

Emaitzak alderdi bakoitzeko

EAJ

Hauteskunde osteko itunengatik onura handia lortu dute jeltzaleek eta, PSE-EE gobernu-bazkidearekin hitzartutako akordioak lagunduta, Donostiako eta Bilboko Alkatetzei eutsi dizkiete.  

EH BILDU

Koalizio independentistak ez du Gasteizko nahiz Iruñeko Alkatetzak lortu, baina aginte-makila eskuratu du Hego Euskal Herriko udalerri garrantzitsuenetan, hala nola, Laudion, Arrasaten, Andoainen… Zerrenda bozkatuena nahiz tokiko plataformen babesa izateagatik.

PSE

EAJren eta PPren babesari esker, Maider Etxebarria Gasteizko alkate izendatu dute. EH Bildu zerrenda bozkatuena izan zen hauteskundeetan, baina Rocio Viterok ez du inbestidura-saioan boza kopuru nahikorik lortu.

PP

Alderdi Popularrak bi Alkatetza lortu ditu Euskadin: Bastidan eta Mañuetan (300 bat biztanleko Araba Errioxako udalerri bat). Bastidan, EAJk hautagaia aurkezteari uko egin zion, EH Bilduk bere babesa eskaini arren.

Eguneko bitxikeriak

Jose Maria Gorroño, Guztiontzako Herria plataformaren hautagaia, bosgarren aldiz hautatu dute Gernikako alkate,  EAJko zinegotzien aldeko botoei esker. Aginte-makila hartu berritan jakinarazi du hilabete barru dimisioa emango duela eta bere anaiaren esku geratuko dela kargua. EAJk babes hitzeman zion inbestidura-saioan, baina trukean, dimisioa eman beharko du Gorroñok, bere zerrendaren bigarrenaren alde.

Bestalde, Bastidako EAJko hiru zinegotziek kargua hartu dute gaurko udal-osaketa saioan eta, segidan, dimititu egin dute, hautagairik ez aurkezteko alderdiak emandako aginduak "inpotentzia" eta "nazka" sortzen diela argudiatuta. EAJk alkategairik aurkeztuko ez zuela iragarri zuen, PPren hautagaiaren onerako.