Sanchez Moncloan da, Espainiako presidente jarraituko duen ala ez iragartzeko agerraldian

Pedro Sanchez Espainiako Gobernuko presidenteak agerraldia egingo du gaur 11:00etan, hasiera batean iragarritakoa baino ordubete lehenago, Espainiako Gobernuko presidente izaten jarraituko duen ala ez argitzeko. Hausnarketarako egun batzuk igarota, ikusmin handiaren erdian eta aukera guztiak zabalik direla emango du Sanchezek bere erabakiaren berri, egunotan agintari eta militante sozialisten elkartasun oldearen oihartzuna oraindik airean dela. 

Estatuko Komunikazio Idazkaritzak ohar bidez jakinarazi du agerraldia eguerdian izango zela. Dena dela, handik gutxira, eguneratzea bidali du hitzordua ordubete aurreratuta. Iragarritako leku berean, Moncloa jauregian izango da adierazpen instituzionala. Adierazpena izanda, ez da kazetarien galderarik onartuko. 

Sanchezek asteazkenean iragarri zuen egun batzuk behar zituela, fokuetatik kanpo, hausnarketarako, eta erabakitzeko ea merezi ote dion Exekutiboaren buruzagitzan jarraitzea, PPren, Voxen eta eskuinaren eta ultraeskuinaren aldeko hedabide eta erakundeek bere eta Begoña Gomez bere emaztearen aurka abiatutako "jazarpen eta eraispen" kanpainaren aurrean. 

Madrilgo epaitegi batek eginbideak hasi zituen joan den astean, Manos Limpias sasi sindikatu ultraeskuindarrak Begoña Gomezen aurka negozioetan ustelkeria eta eragimen-trafikoa egotzita jarritako salaketaren ondorioz. 

Iragarpena egin zuenetik, ez ministrorik, ez PSOEko buruzagirik, ez da ausartu Sanchezek astelehenean esango duena aurreratzera. Publikoki mintzatu direnak edo hedabide eta agentziek kontsultatu dituzten guztiak bat datoz honetan: ezin da aukerarik baztertu, aukera guztiak zabalik daude. 

Transmititzen duten sentsazioa da Sanchezek dimisioa ematea pentsatu zuela bere emaztearen aurkako salaketaren berri izan ondoren, baina, beroan erabakirik ez hartzeko, hausnartzeko egun batzuk hartzea erabaki zuela, herritarrei bidalitako gutunean azaldu bezala.

Hausnartzen bai, baina ez bakartuta

Pedro Sanchezek ez du agenda publikorik izan asteazken arratsaldetik, eta Moncloan egon da, baina ez da isolatuta egon. Bere alderdiko ministro eta buruzagiekin hitz egin du, bai eta babesa agertu dioten nazioarteko buruzagiekin ere, hala nola Luiz Inacio Lula da Silva Brasilgo presidentearekin.

Zalantza airean dela, Moncloan eta Ferrazen onartu dute kezka handia dagoela gobernuburuak har dezakeen erabakiarekin. Izan ere, aitortu dute benetako arriskua dagoela dimisioa emateko; are gehiago, batzuek uste dute dimisioarena dela aukera posibleena.

Hala ere, nahiago dute etorkizunak ekar ditzakeen aukerez gehiegi ez jardun. Aukera horiek lirateke, lehenik, karguan jarraitzea eta konfiantza-galdeari aurre egitea; bigarrenik, hemendik hilabete pasatxora hauteskundeak deitzea, eta, azkenik, dimisioa ematea eta beste hautagai sozialista bat inbestitzen saiatzea. 

Zalantzarik gabe, Sanchezek karguan jarraitzea da alderdikideek nahi duten aukera (erabaki estrategikoa izan dela diotenei arrazoia emango liekeen arren), eta ez dute uste Sanchezek ekainaren 9ko Europako Parlamenturako hauteskundeen ostean Europako Kontseiluko presidente izateko Europar Batasunean kargu bat lortu nahi izatea dagoenik jokabide horren atzean. 

Hala ere, adituen esanetan, azkenean dimisioa ematea erabakiko balu, irteera ez litzateke hauteskunde deialdi bat izango, Sanchezen eta Sanchezen emaztearen aurkako kanpainaren atzean daudenei aukera zabaltzea litzatekeelako.

Horien arabera, ez da mugimendu estrategiko bat, gai pertsonala baizik, eta Sanchezek erabaki behar duena da aurrerantzean ere bere eta bere emaztearen aurkako erasoei aurre egiten jarraitzea merezi duen. 

Begoña Gomezek Air Europarekin izan zitzakeen harremanari buruzko informazioak argitaratzen hasi zirenean, balizko eragimen-trafikoari buruzko zalantza sortuz, Sanchez haserre agertu zen elkarrizketa pribatuetan, ez bakarrik ziur zelako albiste horiek faltsuak zirela, baizik eta emaztea erabiltzen ari zirelako berari min egiteko.

"Pedro, gera zaitez"

Emaztearen aurka eginbide judizialak ireki zituztela jakin zuenean, ordea, gainezka egin zuen, eta bere agenda zenbait egunez bertan behera uzten zuela iragarri zuen, alderdikideek inola ere nahi ez duten dimisioaren aukerari atea irekita. 

PSOEk larunbaterako deitutako Batzorde Federalaren bilera (Europako hauteskundeetarako hautagaitza onartzeko) bere buruzagiari babesa emateko ekitaldi bihurtu zuen. Eusteko deia egin zioten Sanchezi, alderdi osoaren babesa erakutsiz. 

"Pedro, gera zaitez" izan zen Maria Jesus Montero Espainiako Gobernuko lehen presidenteorde eta PSOEko bigarrenak bilera horretan eman zuen hitzaldiaren abiapuntua. Alderdiko gainerako buruzagiek ez ezik, idazkari nagusiari babesa emateko Espainia osotik Madrilera joandako milaka militantek ere bat egin zuten dei horrekin.

Mobilizazio horrek zalantzak uxatuko dizkion itxaropena du alderdiak, eta oraindik erabaki irmorik hartu ez badu, karguan jarraituko duela iragartzea espero du.

Astelehenean Moncloa jauregian egingo duen agerraldian argituko ditu Sanchezek galdera horiek guztiak. Erabakitzen duena erabakitzen duela, garai berri bat hasiko da.