Kongresuak Sumar, ERC eta Podemosen ekimen bat tramitatuko du, Israeli arma-blokeoa ezartzeko

Diputatuen Kongresuko Osoko Bilkurak babesa eman dio gaur Sumarren, ERCren eta Podemosen ekimen bati. Genozidioak, gerra krimenak edo gizateriaren aurkako delituak egiten dituzten estatuei (Israeli, esaterako) arma-blokeoa ezartzea ahalbidetuko luke erreformak.

PSOEren, EAJren, EH Bilduren, BNGren eta Juntsen aldeko botoekin eta PPren eta Voxen aurkako bozekin (176 alde eta 171 aurka), Ganberak lege proposamena izapidetzea onartu du.

Proposamenak 2007ko legea erreformatu nahi du, defentsa materialaren kanpo-merkataritza kontrolatzeari buruzkoa, eta nazioarteko zuzenbide humanitarioa urratzen duten estatuei armak saldu, erosi edo elkarrekin trukatzea blokeatzeko aukera sartu nahi du.

Eztabaida gaur izan da, Kongresuan. Izan ere, Fernando Grande-Marlaska Barne ministroak Guardia Zibilarentzako milioika bala Israelgo enpresa bati erosteko kontratuaren berri emateko agerraldiaren bezperan.

Eztabaida dela eta, Kongresuaren aurrean Israeli arma-blokeoa ezartzea eskatzeko elkarretaratzea egin dute 500 bat pertsonak. Besteak beste, Veronica Barbero Sumarren taldearen bozeramaileak, Gerardo Pisarello En Comú Podemeko kideak eta Gabriel Rufian ERCren diputatuak parte hartu dute protestan.

Pisarellok, Sumar taldearen izenean, defendatu du ekimena Kongresuan eta Pedro Sanchez Espainiako gobernuburuari "egiezak" esateagatik edo "testigantza faltsua" egiteagatik kritikatu du. Israelek palestinarrak sarraskitzen dituela onartu arren, Espainiako portuetatik Estatu sionistara armak bidaltzen jarraitzen dutela aurpegiratu dio Pisarellok buruzagi sozialistari, baita Martina Velarde Podemosen diputatuak ere.

Caridad Rives diputatu sozialistak kritikei erantzun ez, eta adierazi du Sanchezek eta PSOEk Palestinarekin duten konpromisoa eta Gazako sarraskia gaitzesten dutela.

PPk, aldiz, "antisemitismo zaharkitu kiratsa duen pastitxe juridikotzat" jo du proposamena, eta ezkerreko alderdiei "interes politikoengatik Ekialde Hurbileko sufrimendua erabiltzeari uzteko" eskatu die.

Alberto Asarta Vox alderdi ultraeskuindarraren ordezkariak ohartarazi duenez, balizko blokeoak segurtasun indarren eraginkortasunari, martxan dauden defentsa materialen proiektuei eta enpresei kalte egin diezaieke.

Bestalde, BNGren, EAJren, EH Bilduren eta ERCren bozeramaileek proposamena aintzat hartzearen alde egin dute, baita Juntsek ere; hala ere, Isidre Gavin diputatu kataluniarrak iragarri du zuzenketak aurkeztuko dituztela, eta argi utzi du ez dutela onartuko gaia "arma politiko gisa" erabiltzea.