Euskadik ez du, oraingoz, maskara osasun-zentroetan ezarriko, Ministerioak gomendatu arren

Eusko Jaurlaritzak oraingoz ez du aurreikusi osasun-zentroetan maskarak nahitaez erabiltzea gripea eta arnas aparatuko beste infekzio batzuk ugaritzen ari direlako, nahiz eta Osasun Ministerioak gomendatu duen eta beste erkidego batzuek jada egin duten.

Arnas infekzioen gorakadaren ondorioz, osasun-zentroetan musukoen erabilera derrigortzeko eskatuko die Osasun Ministerioak autonomia erkidegoei astelehenean egingo duten Osasun Sistemako Lurralde arteko Kontseiluan. Kataluniako, Valentziako eta Murtziako osasun-zentroetan nahitaez erabili behar dira berriro musukoak, egungo egoeraren aurrean prebentzio-neurri gisa.

Egoera aztertzeaz gain, herritarren immunizazioa sustatzeko jarraibideak zehaztuko dituzte; izan ere, datozen egunetan A motako gripe-kasuek eta bestelako arnas infekzioek gora egiten jarraituko dute. Baliteke urtarrilaren azken astean pilatzea kasu gehienak.

Monica Garcia Osasun ministroak aurreratu duenaren arabera, eskaera hori helaraziko die Osasun Ministerioak autonomia erkidegoei astelehenean, ezohiko osoko bilkuran. Bertan, "irizpideak bateratzen" saiatuko dira, eta, arnas infekzioen gorakadaren aurrean, autonomia erkidegoek hartu beharko lituzketen neurriak aztertuko dituzte.

Gripeak eta koronabirusak, besteak beste, eragindako arnas infekzioen gorakadaren aurrean, urtez urte sortzen diren arazoak aztertuko dituzte asteleheneko bileran. Miren Basaras mikrobiologian doktoreak Radio Vitorian azaldu duenez, datozen egunetan kasuek gora egiten jarraitzea espero da, pertsona asko lantokietara eta ikastetxeetara itzuliko baitira.

Testuinguru horretan, txertoak kutsatzeei aurre egiteko neurri eraginkorra direla azpimarratu du Basarasek, eta sintomak dituzten pertsonek, gertukoak babesteko, musukoa erabili beharko luketela erantsi du.

Gripe-kasuak % 27tik % 46ra igo dira astebetean Espainiako Estatuan, eta identifikatutako kasuen % 98,9 A motakoak dira.

Datu horien aurrean, Lehen Mailako Arretako zentroetan maskararen erabilera derrigorrezkoa izatea eskatu dute osasun-arloko profesionalek, gripea, koronabirusa eta bestelako arnas gaixotasunak are gehiago ez zabaltzeko.

Hala ere, Eusko Jaurlaritzak ez du aurreikusi, oraingoz behintzat, maskararen derrigortasuna ezartzea, osasun-zentroetan eta ospitaleetan gomendatzen duen arren, Osakidetza prest dagoelako egungoa baino presio igoera handiagoak jasateko, eta herritarren arreta-beharrei "une oro" erantzuten ari delako.

Arnas birusak jotako pazienteen kopuruak gora egin duenez, batez ere gripearenak eta covid-19arenak, bere gaitasuna handitu du larrialdietan eta ospitaleetan, solairu osagarriak ireki eta 184 ohe gehiago egokituta: 120 Bizkaian, 40 Araban eta 24 Gipuzkoan.

"Gure erkidegoan ez dago saturaziorik, ezta kolapsorik ere", azpimarratu dute Saileko iturriek, eta "ondo" erantzuten ari direla nabarmendu dute, premiaren arabera aurreikusitako kontingentzia-egitasmoak martxan jarrita.

Infekzioak jaitsi egin dira azken astean, EAEn

Osasun Sailaren abenduaren 25etik 31ra bitarteko asteari dagokion azken txostenaren arabera, arnas sistemako infekzio horien tasa 555,1 kasukoa izan zen 100.000 biztanleko, aurreko astekoa (578,2 kasu) baino txikiagoa.

Tasarik altuena Gipuzkoan izan da (594,9 kasu), Bizkaian (570,4) eta Araban (416,4) baino handiago izan baita bertan.

Tasarik altuena 0 eta 4 urte bitarteko haurren artean dago (1.852 kasu 100.000 biztanleko), eta, ondoren, 5 eta 14 urte bitartekoen artean (624,9 kasu).

Aurreko asteko tasarekin alderatuta, tasak jaitsi egin dira adin-talde guztietan, 64 urtetik gorakoen taldean izan ezik.

Hala ere, arnas infekzioen kasu larriek, ospitaleratzea eskatzen dutenek, gora egin dute, eta 29,5 kasu daude 100.000 biztanleko (20,8 aurreko astean); kasu gehienak 64 urtetik gorakoak dira.

Txostenaren arabera, gripe kasuak igo dira gehien. Azken astean, 935 kasu zenbatu ditu Osakidetzak, eta 552 izan ziren aurreko zazpi egunetan.

Koronabirus kasuak 347 izatetik 465 izatera igaro dira, eta Arnas Birus Sinzitiala (ABS) dutenak 222 izatetik 197 izatera jaitsi dira.