Israel Gazan egiten ari den genozidioa gaitzetsi dute Hego Euskal Herriko bi parlamentuek

Eusko Legebiltzarrak, gehiengo zabalarekin, modu "irmoan eta ñabardurarik gabe" gaitzetsi du Israelgo Estatua Gazako herritar zibilen aurka egiten ari den genozidioa, eta Palestinarentzat "ondorio suntsitzaileak" dituela adierazi. Era berean, Nafarroako Parlamentuak PSNren mozio bat onartu du, "Israelgo Estatua egiten ari den genozidioa" gaitzesteko, eta eskualdean su-eten iraunkor eta egiaztagarria berehala ezartzea eta zibilen aurkako indarkeria mota oro gelditzea eskatzeko.

Gasteizko Ganberaren kasuan, EAJk, EH Bilduk, PSE-EEk eta Sumarrek egin dute ekimenaren alde. Mozioa Sumarrek aurkeztu du, eta gainerako indarrek zuzenketak aurkeztu dizkiote. PPk hainbat punturen aurka bozkatu du, horietako bat Israelek palestinarren aurka egindako genozidioari buruzkoa, eta beste batzuetan babestu edo abstenitu egin da. Vox alderdi ultraeskuindarrak ez du eztabaidan parte hartu, eta zuzenketa osoaren aurka bozkatu du.

Eusko Legebiltzarrak berehalako su-eten iraunkorra, indar militarrak lurralde okupatuetatik erretiratzea eta nazioarteko zuzenbide humanitarioa eta nazioarteko ebazpenak erabat errespetatzea eskatu du ekimenean.

Era berean, Gazako Zerrendan laguntza humanitarioa sartzeko bide seguruak berma daitezen eskatu du, "legez kanpoko blokeo ankerra" bertan behera utzi eta Palestinako okupazioarekin amaitzeko.

Gazako osasun sistemaren suntsiketa sistematikoa ere salatu du EAEko Ganberak, ospitaleen, anbulantzien eta medikuen kontrako bonbardaketak barne.

Gogora ekarri duenez, Israelek 1.500 osasun profesional baino gehiago hil ditu, tartean medikuak eta erizainak, eta larrialdietako baita sorospeneko langileak ere.

Gainera, Europar Batasunari eskatu dio presionatu egin dezala Genevako Hitzarmena errespetatu dadin; izan ere, estatu guztiek gatazkan dauden eragileei armak saltzea debekatzen eta Nazioarteko Zigor Gortearen ikerketak babestea eskatzen du hitzarmen horrek.

Eskaera horiek guztiak Eusko Legebiltzarrak helaraziko dizkie Espainiako Gobernuari, Europako Parlamentuari, Palestinako enbaxadari, Palestinako Errefuxiatuentzako Nazio Batuen Agentziari (UNRWA) eta giza eskubideen aldeko erakundeei.

Nafarroako Parlamentuan, antzeko mozio bat onartu dute UPN, PSN, EH Bildu, Geroa Bai eta Zurekin indar politikoen aldeko botoekin. PPNk, Talde Mistoak eta atxiki gabeko parlamentariak, ostera, aurkako boza eman dute.

Nafarroako mozioan, halaber, laguntza humanitarioa berehala, behar bezala eta modu iraunkorrean berrezartzea eskatu dute, eta Nazio Batuen agentzia humanitarioei babesa adierazi diete, bereziki UNRWAri.

Era berean, Israelgo Estatuak lurralde palestinarrak okupatzea eta kolonizatzea gaitzetsi dute, baita lurralde horietan giza eskubideen eta Nazioarteko Zuzenbide Humanitarioaren "urraketa sistematikoak" ere.

Nafarroako Ganberak ere elkartasuna adierazi nahi izan dio Palestinako herriari, autodeterminaziorako, bakerako eta Estatu propio eta subirano batean bizimodu duina izateko duen eskubidea aitortuz, eta gatazkari irtenbide politikoa emateko lanean jarraitzeko eskatu du, bi estatuen konponbidea ezarrita.

Gainera, Europar Batasunari eskatu diote bertan behera utz dezala EB-Israel Elkartze Akordioa, eta Espainiako Gobernuari eskatu dio Europako herrialdeen eta herrialde arabiar eta islamiarren arteko elkarrizketa indartzeko, gatazkak modu baketsuan konpontzeko bide gisa multilateralismoaren aldeko apustua eginez.