Azpeitiko istiluen aurrean EH Bilduren jarrera kritikatu dute EAJk, PSEk, PPk eta Ertzaintzako sindikatuek

EAJk, PSE-EEk, PPk eta Ertzaintzako sindikatuek irmo kritikatu dute EH Bilduren jarrera asteburuan Azpeitian izandako istiluetan hainbat ertzain zauritu ondoren. Zehazki, onartezintzat jo dute gertatutakoa, eta ordezkari publikoei eskatu diete anbiguotasunik gabe arbuiatzeko polizia-kidegoen aurkako edozein jazarpen edo indarkeria mota.

Hala, EAJk "onartezintzat" jo ditu Ertzaintzaren aurkako erasoak, eta uste du zenbait politikariren "ekidistantzia beldurtzeko modukoa" dela. Andoni Busquet jeltzaleak esan du azkenaldian "onartezinak diren jokabideak" ematen ari direla, eta gogorarazi du Azpetian Udaltzaingoaren eta Ertzaintzaren agenteei egindako erasoak "ez direla lehenak". Bere ustez, "pentsaezina eta onartezina da" ordezkari politikoek "jazarpen edo eraso jokabideak barkatzea".

Halaber, Eider Mendoza Gipuzkoako ahaldun nagusiak "erabat" gaitzetsi ditu istiluak, eta udaltzainen eta ertzainen aurkako erasoei "zilegitasunik ez emateko" eskatu die ordezkari publikoei; "bereizketarik egin gabe". Ildo horretatik, elkartasuna eta babesa adierazi die "erasoa eta jazarpena" jasan zuten udaltzainei eta ertzainei. Azpimarratu du zenbait kasutan, Azpeitikoan kasu, ertzainak bertaratu behar direla, "tentsio-uneen aurrean", udaltzainen laguntza-eskaera jaso ondoren.

Bestalde, EH Bilduk uste du "eskandalagarria eta adierazgarria" dela aurreko astean NBEk torturen inguruan argitaratutako txostenaren aurrean politikariek izandako "isiltasuna".  "Salaketa hain larria" izanik, harrigarritzat jo du koalizio abertzaleak albistea oharkabean igarotzea, eta, aldiz, Azpeitian egindako pintaketa baten harira izandako istiluen inguruan hainbesteko arrabotsa atera izana. Arkaitz Rodriguez EH Bilduko Ekintza Politikoko idazkariak uste du Nazio Batuen Erakundearen txostena "sekulako kolpea" dela Espainiako estatuarentzat, bertan islatzen den errealitateak "agerian utzi duelako estatuak indarkeria" erabili duela Euskal herrian, hori ukatzen dutenen errelatoa gezurtatuz.

Bestalde, Jose Ignacio Asensio Gipuzkoako PSEko idazkari nagusiak X kontuan zabaldutako mezu batean, EH Bildu "gertaera hain larriei garrantzia kentzen" saiatu izana salatu du: "Azpeitian gertatutakoa onartezina da demokraziaren ikuspuntutik. Elkarbizitzak arauak eta legeak errespetatzea eskatzen du. Poliziei egindako erasoak eta mehatxuak Alderdi Sozialistatik beti deitoratu dugun indarkeria mota baten kulturaren parte dira".

Muriel Larrea Gipuzkoako PPko presidente eta legebiltzarkideak Ertzaintzaren eta Udaltzaingoaren jarrera babestu du igande honetan Azpeitian izandako istiluetan, eta EH Bilduri "indarkeria zuritzea" leporatu dio. "Ezin zaio larritasunik kendu poliziari egindako eraso bati. Hori ez da anbiguotasuna: elkarbizitza erasotzen dutenekin konplizitatea da ", esan du Larreak.

Testuinguru horretan, ErNE sindikatuak "Ertzaintzaren lana irmo eta zalantzarik gabe defendatzeko" eskatu die erakunde eta alderdi guztiei. Ohar baten bidez, sindikatuak "gaitzespen irmoa" adierazi du Azpeitian izandako "istilu larrien aurrean". ErNEren esanetan, polizia-agenteen aurkako indarkeria "ezin da inoiz onartu, ezta justifikatu ere, eta agenteek indarra erabiltzea proportzionaltasun, premia eta legezkotasun printzipioetara egokitu zen, Zuzenbide Estatu guztietan eska daitekeen bezala".

Gainera,  Julio Gonzalez Euspeleko presidenteordeak "tamalgarritzat" jo du Azpeitiko Udalak Ertzaintzaren laguntza "neurrigabea" izan zela ziurtatu izana, eta zaurituak azkenean hiru ertzain direla adierazi du.

Euspel sindikatuak elkarretaratzea deitu du datorren asteazkenerako Euskal Autonomia Erkidegoko Justizia Auzitegi Nagusiaren egoitzaren aurrean, Bilbon, azken asteetan Ertzaintzari egindako "erasoak" salatzeko.

Bestalde, Ertzaintzaren Sindikatu Profesionalak (SIPE) salatu du "erakundeen utzikeria", eta Azpeitian gertatutakoaren ondoren "inork ez duela erantzukizunik bere gain hartzen". Sindikatuak ohar batean azpimarratu duenez, "bakarrik, bitartekorik gabe, laguntzarik gabe eta aginpide argirik gabe uzten ari dira, eta emaitza ertzain erasotuak dira, arduradun politikoek beste aldera begiratzen duten bitartean". Juan Carlos Saenz SIPEko antolakuntza idazkariak azpimarratu duenez, "ez da gertaera puntuala, ezta isolatua ere", eta deitoratu du agenteek "autoritate printzipioa galdu" dutela.

Era berean, Iñaki Uraga Ertzaintzaren Esan sindikatuko bozeramaileak "diskurtso indartsua" espero du "iraganeko gertaerek" eta ertzainen aurkako erasoek tarterik izan ez dezaten.