Pradalesen hitzetan, Europako Batzordeak trenbide-korridorea bultzatzeko "konpromiso irmoa" du, eta adierazi du Estatuei presioa egiteko unea dela

Imanol Pradales lehendakariak Bordelen izan da. Haren iritziz, Frantziako eta Espainiako Estatuei presioa egiteko unea da, bi lurraldeen arteko abiadura handiko trenbide-konexioa lortzeko, Euskadi zeharkatuta. 

Lehendakariak Akitania Berrira egindako bi eguneko bidaiari amaiera eman dio gaur, eskualde horretako Alain Rousset presidentearekin batera prentsaurrekoa eginda, Bordelen, astelehenean Europako Batzordeko garraio arloko arduradunarekin bildu ondoren.

Estatuen arteko mugaren bi aldeetan abiadura handiko sareak duen egoeraren berri eman dute prentsaurrekoan, bi presidenteek François Bausch Europa Barneko Garraio Sareko (RTE-T) Korridore Atlantikoaren Europako koordinatzailearekin bildu ondoren, zeinak abiadura handiko sareari bultzada emateko konpromiso sendoak hartu zituen.

Bi agintariek azaldu dutenez, bilera horretan Frantzia eta Espainiaren arteko lotura izan zuten ardatz, Paris-Euskadi-Madril-Lisboa lotura osatzeko beharrezkoa da eta. Europako Batzordeak bultzatu nahi du lotura, eta Frantziak, oraingoz, ez du pauso garbirik eman. 

Lehendakariak azpimarratu du AHTaren konexioaren aldeko apustua garrantzitsua dela, Europak, "ziurgabetasun global handiko" testuinguru batean murgilduta eta inguratuta dagoen heinean, "une erabakigarria" bizi baitu. 

Gogorarazi duenez, Europa autonomia estrategikoaren alde egiten ari den apustuan trenbide lotura hori "erabakigarria" da, bai herritarren mugikortasunerako, bai merkantziak garraiatzeko eta lehiakortasunerako, eta baita elikaduraren, industriaren, energiaren, teknologiaren zein arlo militarraren segurtasunerako ere. 

Euskadiren eraldaketa industrial eta ekonomikorako korridoreak duen garrantzia azpimarratzearekin batera, Europa berrindustrializatzeko ere funtsezkoa dela azpimarratu dau, Paristik hasi eta hainbat industria- eta ekonomia-nodo elkarrekin lotuko lutzkelako, Lisboara, Tolosa, Bordele, Euskadi eta Madril, besteak beste.

Europako Batzordearekin "guztiz" bat datorrela nabarmendu du Pradalesek, eta haren babesarekin Frantziari eta Espainiari presioa egiten jarraituko dutela ziurtatu du, "egin beharrekoa egin dezaten. Europak ezin du itxaron, eta, ardatz atlantikoak, ere ez".