Osakidetzak astelehenean abiatuko du gripearen aurkako txertaketa-kanpaina

Osakidetzak astelehenean, urriak 14, abiatuko du gripearen aurkako txertaketa-kanpaina. Sei astez luzatuko da, eta, horretarako, 400.000 dosi baino gehiago erosi dituzte. Berrikuntza gisa, aurten maskara-banatzaileak jarriko dituzte larrialdietako eta Etengabeko Arreta Guneetako itxarongeletan.

‘Txertoa jartzeko unea da, eta badakizu’ lelopean egingo den kanpaina hau ostegun honetan aurkeztu dute, Bilbon. Bertan izan dira Nekane Murga Eusko Jaurlaritzako Osasun sailburua, Juanjo Aurrekoetxea Osasun Publikoaren eta Adikzioen zuzendaria eta Enrique Peiro Osakidetzako Osasun Publikoaren eta Pazientearen Segurtasuneko koordinatzailea.

Txertoa jartzea gaixotasun horri aurre egiteko “prebentzio-neurri nagusia” dela esan du Osasun sailburuak eta, arrazoi horregatik, 65 urtetik gorakoei, haurdun daudenei eta gaixotasun kronikoak dituzten pertsonei, gripearen aurkako txertoa jartzeko eskatu die, haien osasunean "konplikazioak" gerta ez daitezen. Halaber, osasun arloko langileei ere hartzea aholkatu die, besteak beste, zahar egoitzetako langileei edo arrisku-taldeetako pertsonen zaintzaileei.  

Maskarak osasun-zentroetan

Berrikuntza gisa, eta gaixotasunaren transmisioa eteteko asmoz, maskarak banatuko dira ospitaleetako Larrialdien eta Etengabeko Arreta Guneen itxarongeletan.

Maskara-banatzaile horiekin batera, informazio-kartel bat egongo da, herritarrei gogorarazteko oso garrantzitsua dela eskuetan higienea izatea eta maskara erabiltzea arnas-sintomak izanez gero. Aurrerago, euskarri hauek osasun-zentroetako itxarongeletan jarriko dira ere.

Zer da gripea?

Gripea gaixotasun infekzioso bat da, eta influenzaren birusak eragiten du. Gainera, oso azkar zabaltzen da, kutsakortasun-maila handia baitu. Oro har, izaera kliniko onbera eta mugatua du, biztanleria-talde batzuetan izan ezik, konplikazioak eragin baititzake horietan.

Arrazoi horregatik, kanpaina honetarako, Osasun Sailak 400.000 dosi baino gehiago eskuratu ditu. Dena dela, kopuru hori handitu daiteke, beharrezkoa bada. Horretarako, 1,4 milioi euro bideratu dira, aurreko kanpainan baino% 16 gehiago.

Iaz, gripea zuten 1.662 pertsona ospitaleratu zituzten, eta, horietatik, 435 larri egon ziren. Gainera, 79 pertsona hil egin ziren.