Intzidentzia altuko herrietan ekitaldi jendetsuak bertan behera uzteko deia egin die Osasun Sailak udalei

"Atzera ez egiteko neurriak hartzea ezinbestekoa" delakoan, Eusko Jaurlaritzako Osasun Sailak agindu berria onartuko du izurriaren hedatzea geldiarazten saiatzeko eta neurri "osagarriak" ezarriko ditu horretarako. Hala, 150 kasutik gorako intzidentzia tasa duten udalerrietan mota guztietako ekitaldi jendetsuak "bertan behera utzi edo aldi baterako atzeratzea" eskatu die udalei. Jan-edana, eta beraz maskara kentzea, dakarten jarduerak bereziki zaindu behar direla zehaztu du Sailak.

Horrez gain, antolatzen diren ekitaldietan pilaketak saihesteko neurriak indartzea eskatuko zaie udalei, eta aire librean egindakoak lehenestea, horiek baitira "seguruenak". Hori horrela, tokiko erakundeei egokituko zaie jarduera edo ekitaldi horiek egitea erabakitzea.

Halaber, EAEko Auzitegi Nagusiari bermea eskatu dio hainbat eremutan covid-19 ziurtagiria eskatu ahal izateko. Jaurlaritzaren asmoa honakoa da: gaueko aisialdiko establezimenduetan, kontzertu-aretoetan edo 50 lagunetik gorako edukiera duten ostalaritza-establezimenduetan 12 urtetik gorako pertsonei eskatzea.

Gotzone Sagardui prentsa aurrera azaldu da gobernu bileraren ondotik, eta agerraldian zehaztu ditu asteazkenetik aurrera indarrean egongo diren neurriak. Pandemiak EAEn duen egoeraren argazki bat ere eman du Osasun sailburuak. Iragarri duenez, gainera, aurrerantzean astean bitan kaleratuko dute buletin epidemiologikoa: astelehenetan (orain arte bezala) eta ostegunetan. Datuok eskuan, udalerrietako egoera zehatza zein den jakin ahalko dute udalek, neurri osagarri horiek hartze aldera.

Urriaren 6tik indarrean dauden hiru neurriek bere horretan jarraituko dute. Hots, edukiera muga % 80koa izango da espazio itxietan eta 5.000 lagunetik gorako edukiera duten esparruetan antolatutako ekitaldietan; leku itxietan edota kanpoaldean egiten diren kirol eta kultur ekitaldietan jatearen eta edatearen debekua (ura bakarrik edan daiteke), eta musukoen erabilera derrigorrezkoa barrualdeetan, eta kanpoaldean ere bai, segurtasun tartea ezin bada errespetatu.

"Hazkunde handia"

Sagarduik aitortu duenez, "ez goaz ondo eta joerak adierazten du pandemiak hazkunde abiadura handia duela". Osasun sailburuak aitortu du hazkunde hori ez dela "oraindik" ospitaleetan nabaritu, baina erantsi du "berantiarra" izaten dela eragin hori.

"Egoera erne egoteko modukoa da", esan du sailburuak. Eman dituen datuen arabera, azken 14 egunetan pilatutako intzidentzia tasa 196,25 kasukoa da, eta 136 pertsona daude ospitaleetako gela arruntetan, 27 ZIUetan.

"Duela urtebete baino hobeto gaude, zalantzarik gabe. 2020ko azaroan 824 kasukoa zen intzidentzia, eta 145 gaixo genituen ZIUetan eta 516 erietxeratuta. Ez geneukan txertorik, gainera", aitortu du.

Sagarduiren ustez, txertaketak "aldea" ezarri du egoeran, eta biztanleriaren "babes maila ona da". Hala, horren ustez, adierazle nagusien balorazioak ezberdina izan behar du.

Zehaztu duenez, adin tarte batzuetan txikiagoa da babes maila. Hori horrela, 30-39 urteko biztanleriaren % 17k, 20-29 urteko % 21ek eta 16-19 urteko % 13k ez du pauta osoa jaso. Horren ondorioz, biztanleriaren talde batzuetan "intzidentzia handiagoa" da, adibidez, 12 urtetik beherako haurrengan (ez dute txertorik) eta 30-39 urtekoen artean.

Azkenik, kazetarien galderei erantzunez, sailburuak iragarri du delta plus aldaeraren kasu bat atzeman dutela EAEn. Dena dela, azpimarratu du kasu hori ez dagoela kutsatzeen gorakadarekin lotuta. "Azpi-aldaera horrek ez du erakutsi delta aldaerak transmititzeko duen ahalmena baino handiagoa", gaineratu du.