Europako agintariek Zelenskiri babesa eman diote, Trumpekin izandako ika-mikaren ondotik

Europako agintariak Volodimir Zelenski Ukrainako presidentearen alde agertu dira, Donald Trump AEBko presidentearekin Etxe Zuriko Bulego Obalean izandako liskarraren ostean.

Ursula von der Leyen Europako Batzordeko presidenteak, Antonio Costa Europako Kontseilukoak eta Roberta Metsola Europako Parlamentukoak babesa adierazi diote Ukrainako presidenteari, eta "zure duintasunak Ukrainako herriaren ausardia ondratzen du", esan diote.

Emmanuel Macron Frantziako presidenteak Ukrainan Errusiaren inbasioaren aurrean borrokan ari direnei erreferentzia eginez esan duenez, "hasieratik borrokan ari direnak errespetatu behar dira".

Donald Trump eta Volodimir Zelenski AEBko eta Ukrainako presidenteek Etxe Zurian egindako bileraren ostean, honakoa azpimarratu du Macronek: "Denok ezagutzen dugu egoera; erasotzailea Errusia da, eta erasotutako herria Ukrainakoa".

"Uste dut guk arrazoia izan dugula Ukrainari laguntzeko eta Errusia zigortzeko duela hiru urtetik, eta horretan jarraitzeko. Eta guk diodanean, Ameriketako Estatu Batuak, europarrak, kanadarrak, japoniarrak eta beste batzuk dira", azpimarratu du.

"Eskerrak eman behar zaizkie lagundu dutenei, eta errespetatu egin behar dira hasieratik borrokan ari direnak, euren duintasunaren, independentziaren, seme-alaben eta Europaren segurtasunaren alde borrokatzen ari direlako", esan du. "Gauza sinpleak dira, baina ondo dago une honetan gogoraraztea", nabarmendu du Frantziako presidenteak.

"Inork ez du bakea nahi Ukrainako herritarrek baino gehiago", idatzi du Olaf Scholz Alemaniako kantzilerrak X sare sozialean. "Horregatik bilatzen dugu elkarrekin bake iraunkor eta bidezko baterako bidea. Ukrainak konfiantza izan dezake, Alemaniak eta Europak babestuko dute", azaldu du jarduneko kantzilerrak.

Friedrich Merz Alemaniako hauteskunde orokorrak irabazi zituen bloke kontserbadoreko hautagaiak ere antzeko mezua zabaldu du sare sozial berean. "Volodimir Zelenski maitea, Ukrainaren ondoan gaude une onetan eta estutasunetan. Inoiz ez ditugu erasotzailea eta biktima nahastu behar gerra izugarri honetan", ziurtatu du.

"Ukraina ez dago bakarrik. Alemania eta Europako gainerako aliatuak Ukrainarekin batera eta Errusiaren erasoaren aurka gaude", idatzi du Annalena Baerbock Alemaniako jarduneko Atzerri ministroak.

"Ukrainak Alemaniaren, Europaren eta gehiagoren laguntza izango du. Bere demokraziaren defentsa eta bake eta segurtasun nahiak gure egiten ditugu", erantsi du Baerbockek.

Giorgia Meloni Italiako lehen ministroak AEBren, Europako estatuen eta aliatuen artean berehala goi-bilera bat egitea proposatu du Ukrainaz hitz egiteko. "Beharrezkoa da goi-bilera bat egitea berehala AEBren, Europako estatuen eta aliatuen artean egungo erronkei aurre egiteko, Ukrainatik hasita", azaldu du Melonik, bere bulegoak zabaldutako ohar batean.

Pedro Sanchez Espainiako Gobernuko presidenteak ere babesa agertu dio Zelenskiri. "Ukraina, Espainia zurekin dago", idatzi du X sare sozialean.

Era berean, "Zelenski maitea, ukrainar lagun maiteak: ez zaudete bakarrik", argitaratu du Donald Tusk Poloniako lehen ministroak sare sozial horretan.

Luis Montenegro Portugalgo lehen ministroak X sarean idatzi duenez, "Ukrainak Portugalen laguntza izango du beti", eta Petr Fiala Txekiako lehen ministroak Ukrainari babesa ematen jarraituko dutela adierazi du. "Mundu librearen alde gaude", esan du.

Ildo beretik joan dira Lituaniako presidente Gitanas Nausedaren ("Ukraina ez da inoiz bakarrik izango"), Letoniako lehen ministro Evika Silinaren eta Suediako gobernuburu Ulf Kristerssonen mezuak, "Ukraina bere askatasunaren alde ez ezik, Europa osoaren alde ere borrokatzen ari da", azpimarratu baitu.