EAJ garaile eta EH Bilduk bi eserleku gehiago, Soziometroaren arabera

EAJk berriro irabaziko lituzke Eusko Legebiltzarrerako hauteskundeak, 2020ko hauteskundeetako emaitzak errepikatuta, Eusko Jaurlaritzak boto-asmoari buruz argitaratu duen azken soziometroaren arabera. Gaur egun dituen 31 eserlekuei eutsiko lieke EAJk, eta gaur egungo 10ei PSE-EEk; beraz, gehiengoa lukete, berriro, bien artean. Bi eserleku irabazita, 23 eserleku lortuko lituzke EH Bilduk. Legebiltzarkide kopuru bera lortuko lukete PP+Cs taldeak (6) eta Voxek (1). Elkarrekin Podemos-IU (6), berriz, 4 eserlekurekin geratuko litzateke, 2 eserleku galduta. EH Bildu litzateke ordezkari gehiago lortuko lukeen alderdi bakarra.

EAJk lehen indar izaten jarraituko luke (31 eserleku), EH Bildu (23), PSE-EE (10), PP+Cs (6), Elkarrekin Podemos-IU (4) eta Vox (1) alderdien aurretik. 

Datuak lurraldez lurralde aztertuta, eserlekuen banaketa honakoa litzateke:

- Araba: EAJ 9, EH Bildu 7, PSE-EE 4, PP+Cs 3, Elkarrekin Podemos-IU 1, Vox 1

- Bizkaia: EAJ 12, EH Bildu 6, PSE-EE 3, Elkarrekin Podemos-IU 2, PP+Cs 2

- Gipuzkoa: EAJ 10, EH Bildu 10, PSE-EE 3, Elkarrekin Podemos-IU 1, PP+Cs 1

Hiru lurraldeetan irabaziko luke EAJk, baina boto gutxiko aldea aterako lioke EH Bilduri Gipuzkoan.

Araban, 2020ko hauteskundeetako emaitzekin alderatuta, Elkarrekin Podemos-IUk ordezkari bat galduko luke EH Bilduren mesedetan.

Bizkaian ez litzateke aldaketarik egongo eserlekuen banaketan.

Gipuzkoan, Elkarrekin Podemos-IUk legebiltzarkide bat galduko luke (1ekin geratuko litzateke), eta EH Bildu EAJrekin berdinduta geratuko litzateke (10 ordezkari bakoitzak). Boto kopuruari dagokionez, jeltzaleek abertzaleek baino % 1,1 boto gehiago lortuko lituzkete: botoen % 36,1 lortuko lituzke EAJk eta botoen % 35 EH Bilduk.

Soziometro hau egiteko datuak 2021eko azaroaren 29a eta abenduaren 3a bitartean bildu zituzten (biak barne) ordenagailuz lagunduta banaka telefonoz elkarrizketak eginez (CATI). Eusko Jaurlaritzako Prospekzio Soziologikoen Kabineteak diseinatu du galdeketa, eta Ikerfel enpresa arduratu da datuak biltzeaz, EAEko biztanleriaren lagin adierazgarri bati egindako galdetegi egituratu eta itxi baten bidez.

EAEko hiru lurraldeetako 18 urtetik gorako bizilagunak galdekatuko dituzte horretarako: Arabako 800 pertsona, Bizkaiko 1.449 eta Gipuzkoako 1.084; hau da, 3.333 pertsona elkarrizketatu dituzte guztira.