Jaurlaritzak 500 milioi euro gehiago onartu ditu enpresari txiki eta autonomoentzat
Enpresari txiki eta ertainei zein autonomoen kolektiboari bideratutako laguntzak 500 milioi eurotan handitzea onartu du Eusko Jaurlaritzak, Iñigo Urkullu lehendakariak ostiral honetan jakinarazi duenez. Gauzak horrela, koronabirusak eragindako krisiari aurre egiteko helburuarekin martxan jarritako ekimena 1.555 milioi eurora iritsiko da.
Zehazki, Eusko Jaurlaritzaren kudeaketa azaltzeko asmoz Eusko Legebiltzarreko Diputazio Iraunkorrean gaur goizean egin duen agerraldian egin du iragarpena lehendakariak. Bertan, koronabirusaren aurka hartutako neurriak azaldu ditu, eta COVID-19 gaitzak arlo ekonomikoan eragindako ondorioen berri eman du.
Lehendakariak adierazi duenez, Eusko Jaurlaritzak aurtengo aurrekontua berregituratu behar izan du "krisi honen ondorioei erantzuteko neurriak" hartzeko, eta, ildo horretatik, kapital zirkulatzailea finantzatzeko lerroa 500 milioi eurotan handituko dutela iragarri du, enpresa txiki eta ertain zein autonomoen "kalteak arintzeko".
Bere hitzetan, laguntza berri horrek 5.000 eurotik milioi eurora bitarteko beharrak estaltzen ditu. Urkulluk azaldu duenez, Kreditu Ofizialeko Institutuaren osagarria da, baina "baldintza hobeetan", eta Eusko Jaurlaritzak bere gain hartzen du kostua, zero intereseko maileguak direlako, eta, ondorioz, ez dutelako amortizazio edo kitatze komisiorik.
Eusko Legebiltzarrean azpimarratu duenez, tresna hori "oso erabilgarria" izaten ari da merkataritza eta ostalaritza sektoreentzat, eta egunotan aztertzen ari diren espedienteen % 40 profesional autonomoei dagozkiela gaineratu du.
Testuinguru horretan, Eusko Jaurlaritzak orain arte hartutako neurri sozial eta ekonomiko guztiak jasotzen dituen dokumentua igorri dio lehendakariak Diputazio Iraunkorrari, eta Euskadiko elkarte sozial eta ekonomikoek parte hartzen duten Mahai sozio-ekonomikoarekin lankidetza publiko-pribatutik lanean ari direla gaineratu du.
Bestalde, hamar egun hauetan jardunera itzuli diren enpresak "normaltasunaren barruan, ia gorabeherarik gabe" egin dutela egiaztatzea "garrantzitsua" dela esan du Urkulluk. Halaber, Euskadin jarduera "apurka-apurka suspertzen" ari dela ziurtatu du.
Dena dela, Jaurlaritzak "erne" jarraituko du, laneko osasun eta segurtasun protokoloak "errespetatu eta bete" daitezen. Hala, lehendakariak ziurtatu du jardunera itzultzean enpresen barruan akordioa lehenetsi dela langileen ordezkari sindikalekin, eta, astelehen honetan, Elkarrizketa Sozialerako Mahaiaren lantaldea berriro bildu zela gogora ekarri du.
"Ahalegina areagotu behar dugu, egindako lan guztia zapuztu ez dadin. Zorrotzak izaten jarraituko dugu, baina txertoa aurkitu arte ezin dugu gizartea erabat gelditu. Normaltasun berrirako trantsizio zuhur eta seguru baterako baldintzak bermatzea da kontua", gaineratu du.
Zure interesekoa izan daiteke
Ikuskizunetako teknikarien grebaren deitzaileak pozik agertu dira, lanuzteak izan duen jarraipenarekin
Teknikariok, ESK, LAB, UGT, CCOO, ELA eta CNT Euskal Autonomia Erkidegoko ikuskizunen lehen hitzarmena negoziatzen ari dira, eta patronalari eskatu diote elkarrizketei berriro ekiteko, urtebete baitaramate blokeatuta. Behineko kontratuak, lanaldi oso luzeak, legez ezarritako atsedenaldiak ez errespetatzea, jaiegunetan zein gaueko ordutegian lan egiteagatiko plusik ez jasotzea edota lana eta bizitza pertsonala uztartzeko zailtasunak izatea salatzen dute.
Langabeziak gora egin du uztailean Euskadin eta Nafarroan: 1.378 eta 534 langabe gehiago dago, hurrenez hurren
Euskadin uztailean 105.590 enplegu-eskatzaile egon dira, ekainean baino 1.378 gehiago. Nafarroan, berriz, 534 langabe gehiago izan dira, 28.843. Eusko Jaurlaritzaren arabera, datu hori hainbat langile lan-merkatuan sartzearekin lotuta dago.
Bizkaiko Golkoa eta Frantzia lotuko dituen goi tentsioko linearako kablea jartzen hasi dira, Lemoiz parean
Bizkaiko Golkoaren eta Frantziaren arteko interkonexio elektrikoa gertuago dago. Goi tentsioko linea honek Gatika eta Bordeletik gertu dagoen Cubnezais batuko ditu eta 276 kilometroko tartea egingo du ur azpian. Ekosistemari kalterik egingo ez zaiola ziurtatzeko, Aztik gainbegiratuko ditu lanak.
Ikuskizunetako teknikariek "enpatia" eskatu diete artistei hiriburuetako jaietan deitutako greban
EAEko lehen lan-hitzarmena negoziatzen ari diren sindikatuek lanuzteak deitu dituzte abuztuaren 5, 14 eta 26rako, lan-hobekuntzak eskatzeko eta patronalari negoziazioei berriro ekiteko eskatzeko.
Euriborrak % 2,855ean itxi du uztaila, mailarik altuena 2024ko irailetik
Ekainarekin alderatuta, tasa oinarrizko 6 puntu igo da.
Euroguneko inflazioa % 2,9an kokatu da uztailean, hamarren bat igota
Eurostatek argitaratu berri duen urte arteko tasa % 3,8koa da Espainian, ekainekoa baino bi hamarren handiagoa, eta % 2,4koa Frantzian, joan den hilean baino lau hamarren handiagoa. Energiaren esparruan igo da gehien inflazioa.
Gipuzkoako Moeve gasolindegietako langileek greba ziklo bati ekin diote, lan-baldintzak hobetzeko asmoz
Lehenengo lanuztea ostegunean hasi zen, 22:00etan, eta igandean amaituko da. Mobilizazioen artean, gaur elkarretaratzea egin dute AP-8 autobidearen Oiartzungo gasolindegian.
Gasolina eta gasolioa 6 zentimo baino gehiago garestitu dira litroko, Hidrokarburoen Zerga Bereziaren igoeraren ondorioz
Batez beste, gasolina depositua betetzeak duela urtebete baino 8,5 euro gehiago balio du, eta gasolio deposituak ia 16 euro gehiago, abuztuko irteera-operazio betean.
38 urteko langile bat oso larri zauritu da Alesbeseko kontserba-enpresa batean izandako istripuan
Foru Gobernuak zabaldutako oharraren arabera, langileari ur irakina erori zaio gainera, eta erredurak ditu gorputzaren % 80an.
Bazka erosketa bateratua aztertuko du Euskadik, lehorteak eragindako larre-eskasia dela eta
ENBA sindikatuko eta UAGA Arabako nekazarien elkarteko ordezkariak Eusko Jaurlaritzarekin bildu dira Lakuan, beroak eta euri faltak lehen sektorean eragindako kalteak aztertzeko.