Airearen kutsadura % 45-50 jaitsi da Europan konfinamendu egoeran

Europako zenbait hiri handitan kutsadura atmosferikoak % 45 eta % 50 artean behera egin du azken hilabetean, koronabirusaren konfinamendu neurriak direla eta, Sentinel-5P satelite europarraren neurketen arabera.

Satelitearen arabera, martxoaren 13tik apirilaren 13ra bitartean nitrogeno dioxidoaren (NO2) kontzentrazioa % 48 jaitsi da Madrilen, % 47 Milanen, % 49 Erroman eta % 54 Parisen, Europako Agentzia Espazialak azaldu duenez.

Europako Agentzia Espazialak ohar batean gogorarazi du airean dagoen kutsatzaile nagusietako bat NO2 dela, zentral elektrikoek, ibilgailuek eta bestelako instalazio industrialek sortzen dutena, eta giza osasunerako ondorio kaltegarriak dituela nabarmendu du, arnasketa arazoak sortzeko aukera handitzen baitu.

Herbehereetako Meteorologia Institutuko zientzialariek hilabeteak daramatzate Europar Batasuneko Copernicus programaren satelite horrek eskaintzen duen gas horri buruzko datuak monitorizatzen, Tropomi tresnari esker.

NO2-aren kontzentrazioak atmosferan nabarmen aldatzen dira egunez egun, emisioen gorabeherengatik, baina baita baldintza meteorologikoetan gertatzen diren aldaketengatik ere, eta horrek zailago egiten du egun bateko edo astebeteko neurketetatik soilik ondorioak ateratzea.

Horregatik, epe luzean lortutako datuak aztertzeko interesa dago, gerta daitezkeen anomaliak baztertzeko.

Egun batetik bestera zifrak asko alda daitezkeenez, datuak denbora luzez eta batez bestea lortuz neurtu behar dira "giza jardueraren ondorioz kontzentrazioetan gertatzen diren aldaketak argiago ikustea ahalbidetzen du", adierazi du Herbehereetako Meteorologia Institutuko Zientzialaria den Kenk Eskesek.

Eskesenen taldeak konfinamendu-neurriak datozen asteetan mantenduko direla aprobetxatuz Europako iparraldeko beste herrialde batzuetan azterketa zehatzago bat egingo du. Herrialde horien emaitzetan aldakortasun handiagoa antzeman baita, baldintza meteorologikoen aldaketen ondorioz.

Horri dagokionez, tokian bertan lortutako datuen erabilerak, Copernicus programakoekin batera, horien inpaktua murriztea ahalbidetuko du, airearen kutsaduran emandako aldaketa balioesteko.

Sentinelak Copernicus programarako ingurumeneko informazioa ematen duten Europar Batasuneko satelite flota baten parte dira.