Positibotasuna % 4,4an kokatu eta ZIUetan paziente kopurua zertxobait jaitsi da, EAEn

Covid-19aren positibotasuna % 5aren azpitik jaitsi da berriro Euskadin; % 4,4an kokatu da, hain zuzen ere. Bitartean, ZIUetan dauden paziente larrien kopuruak zertxobait behera egin du azken orduetan.

Eusko Jaurlaritzako Osasun Sailak pandemiaren bilakaeraren inguruko datuak eguneratu ditu larunbat honetan. Horrela, ostiralean 370 positibo berri zenbatu dituzte, bezperan baino 26 gutxiago. 8372 proba egin dituzte, aurreko egunean baino 653 gehiago.

Bizkaian 221 kutsatu berri baieztatu dituzte erakundeek, Gipuzkoan 101 eta Araban 36. Bestalde, bizilekua Euskal Autonomia Erkidegotik kanpo duten 12 pertsonak positibo eman dute.

Ostegunean positibotasunak % 5a (% 5,1) gainditu zuen, zenbait egun azpitik eman ondoren, baina biharamunean % 4,4ra jaitsi da berriro.

Ospitaleetako egoerari dagokionez, 125 pazientek zainketa intentsiboen unitatean jarraitzen dute, aurreko egunean baino 5 gutxiago.

Beste 43 covid gaixo ospitaleratu behar izan dituzte, osteguneko kopuru ia berdina (44).

Muturreko arriskutik ateratzen azken erkidegoa izan da EAE. 14 egunetan 100.000 biztanleko 250 positiboren azpitik jaitsi da; hain zuzen ere, 225,4 kasu ditu Euskadik, Osasun Ministerioak atzo jakinarazi zuenez.

Ohikoa den bezala, datua ez dator bat Eusko Jaurlaritzak emandako zenbatekoarekin. Osteguneko azken balantzean 250,9ko intzidentziaren berri eman zuen EAEko Exekutiboak.

Hala ere, intzidentzia tasaren eta R0 indizearen inguruko informazioa ez dute astelehenera arte eguneratuko.

Bestalde, koronabirusaren pandemiak beheranzko joerarekin jarraitzen du Nafarroan, ostiral honetan 57 kasu positibo berri atzeman ostean (bezperan baino 15 gutxiago). Osasun sistema publikoan 2.109 proba egin zituzten (bezperan baino ia 400 gehiago) eta horietako % 2,7k eman zuten positibo.