R0 indizeak, intzidentzia metatuak eta positibo berriek gora egin dute EAEn

Birusaren birsorkuntza indizeak (R0) gora egin du berriro EAEn, 1,05eraino. Halaber, positibo gehiago atzeman dituzte azken orduetan (344 kasu, hain zuzen), eta intzidentzia metatua 211 kasuraino igo da. Datu positiboa asistentziaren presioan dago, EAEko ospitaleetan covid-19 paziente gutxiago baitaude.

Eusko Jaurlaritzako Osasun Sailak emandako datuen arabera, astelehen honetan 8.680 proba diagnostiko egin dituzte, igandean 5.617 egin ondoren. Horrela, positiboen tasa % 4,5etik % 4ra jaitsi da.

Datuak lurraldez lurralde aztertuta, 169 positibo berri atzeman dituzte Bizkaian (igandean baino 40 gehiago), 136 Gipuzkoan (48 gehiago) eta 31 Araban (1 gutxiago). Horiez gain, Euskal Autonomia Erkidegotik kanpo bizi diren zortzi pertsona kutsatu dira.

Astelehenean 39 pertsona ospitaleratu zituzten EAEko ospitaleetan, bezperan baino zortzi gehiago. Horrela, 162 pertsona daude ospitaleetako gela arruntetan, aurreko eguneko berberak.

Gainera, zainketa intentsiboetako unitateetan 94 gaixo daude egoera kritikoan, aurreko egunean baino hiru gutxiago.

100.000 biztanleko intzidentzia metatuaren kasu positiboen tasari dagokionez, beheranzko joera eten da: astelehenean 211,39an zegoen EAEn, eta 208,48koa izan zen bezperan. Larunbatean, berriz, 209,6 kasu izan ziren. Adierazle horrek gora egin du, 32 egunez etengabe behera egin ondoren. 

Kopuru horiekin, intzidentzia metatuak gora egiten jarraitzen du Araban, 100.000 biztanleko 136,5 kasuraino iritsi baita; beheranzko joerari eusten dio Bizkaian, eta 225,8 kasutan dago jada; Gipuzkoan, berriz, gora egin zuen larunbatean, baina berriro jaitsi zen igandean, 206,1 kasuraino.

Hiriburuetako datuei dagokienez, 131,41 kasu izan dira astelehen honetan Gasteizen (igandean baino ia 4 gehiago). Donostian ere kasu gehiago atzeman dituzte, 200,12 izan baitituzte (199 zituzten bezperan), eta Bilbon 240,42raino jaitsi da (243 zituzten bezperan).

Beste adierazle negatibo bat 1etik gora hazten jarraitzen duen oinarrizko birsorkuntza kopurua da, pandemiaren transmisioa kontrolatuta ez dagoela adierazten duena.

Astelehenean, R0 indizea 1,05ean zegoen (+0,03). Araba eta Gipuzkoa adierazle horren gainetik daude, 1,20 (1,21 bezperan) eta 1,11 (1,07), hurrenez hurren; Bizkaia, berriz, 1etik hurbil dago, eta 0,99an dago.

Intzidentzia-tasen arrazoia (egungo 14 egunetan intzidentzia-tasa metatua duela astebetekoarekin alderatzen duena) 0,96 da Euskadi osoan (0,91 zen aurreko egunean).

Txertaketa

49 urteko pertsonen txertaketa datorren astean hasiko da, aurreikusitako dosiak iristen badira, Gotzone Sagardui Osasun sailburuak iragarri duenez.

Gobernu Kontseiluaren bileraren osteko prentsaurrekoan, Sagarduik esan du pandemiaren bilakaera "positiboa" dela.

Maskara alde batera uzteaz hitz egiteko goizegi dela esan du sailburuak, eta AstraZenecaren lehen dosia hartu duten 60 urtetik beherakoen % 65ek bigarren dosia Pfizer etxekoa izatea onartu dutela aurreratu du.

Ikasgelen egoera

Astearte honetan, 58 ikasgela itxi dituzte pandemiagatik (astelehenean baino 5 gutxiago). Ikastetxe batek ere ez du bere jarduera presentziala erabat eten behar izan covid-19ak eraginda, baina 39ri eragin die (bezperan baino 6 gutxiago).