Legebiltzarrak legealdiko azken hiru legeak onartu ditu, eta gerturatu egin du hauteskunde deialdia

Eusko Legebiltzarrak legealdi honetako azken hiru legeak onartu ditu gaur osoko bilkuran: Haur eta Nerabeena, Lankidetzarako eta Elkartasunerakoa, eta pertsona transexualen eskubideak aitortzeko araudiaren erreforma. Hirurak babes handiarekin atera dira aurrera, Jaurlaritza osatzen duten bi taldeen baiezkoa ez ezik, gutxienez oposizioko talde batena ere izan dutelako. Hauteskunde usaina izan du bilkurak, eta Iñigo Urkullu lehendakariari bozen datari buruz galdetu zaio enegarrenez. Esan duenez, erabakita du, baina, oraingoan ere, ez du iragarri. 

Haur eta Nerabeen Legea izan da eztabaidatzen eta onartzen lehena, eta Nerea Melgosa Berdintasun, Justizia eta Gizarte Politiketako sailburuak egin du horren defentsa. Bere hitzetan, "lege honek ez du parekorik Estatuan, iraultza dakar". Nabarmendu duenez, ganberan izan duen egunik "zoriontsuenetakoa" da gaurkoa, "lege ona" onartuko baitute, "adostasun zabalarekin" gainera. Adingabeak eskubidedun subjektu moduan aitortuko ditu araudiak, eta horien babesa izango da EAEko politika publikoen ardatz. 

Araudia EAJren, EH Bilduren, PSE-EEren eta Elkarrekin Podemos-IUren aldeko botoekin (67) onartu dute. PPk (5) abstentziora jo du, eta Voxek kontra bozkatu du (1). 

Taldeen hitzaldietan, Isabel Gonzalez (EAJ), Gloria Sanchez (PSE-EE), Oihana Etxebarrieta (EH Bildu) eta Eva Juez (EAJ) legebiltzarkideek legearen garrantzia goraipatu dute, eta "paradigma aldaketa" eta "aurrerapausoa" ekarriko dituela nabarmendu. Akordioa lortzeko lau taldeek egindako eginahalak azpimarratzeaz gain, haurren babeserako elkarteek egindako lana eskertu dute. 

Bestalde, Laura Garrido PPko ordezkariak iragarri du taldea abstenitu egingo dela. Zuzenketa batzuk onartu dizkietela onartu badu ere, kritiko azaldu da legearekiko eta, besteak beste, Estatuko Indar eta Gorputzen aipamena kendu dela salatu du. Harago joan da Amaia Martinez (Vox). Horren aburuz, "legea ez da beharrezkoa, eta nahasmena sortzen du". 

Lankidetzarako eta Elkartasunerako lege berria eztabaidatu eta bozkatu dute ondoren. Nerea Melgosa Berdintasun, Justizia eta Gizarte Politiketako sailburua berriro igo da oholtzara, legearen nondik norakoak azaltzera. Araudiak izan duen "babes oso zabala" nabarmendu du Melgosak, eta euskal gizarteak zein gobernuz kanpoko elkarteek ezberdintasunen kontra eta giza eskubideen alde egindako apostua goretsi du. Zentzu horretan, gobernuz kanpoko erakundeak lankidetzaren "motorrak" direla azpimarratu du. 

Bigarren lege hau ia aho batez onartu du Legebiltzarrak, izan ere, Voxek bakarrik egin du kontra. 

Eztabaidan zehar, Markel Aranburu (EAJ) eta Miren Gallastegui (PSE-EE) legebiltzarkideek aldarrikatu dute aurrerantzean EAEko aurrekontuen % 0,7 politika horietara bideratu beharko dela.

Bestalde, Diana Urrea (EH Bildu) eta Iñigo Martinez Zaton (Elkarrekin Podemos-IU) euren hitzaldiak baliatu dituzte Gazako genozidioa eta Auzitegi Nazionalean Euskadi-Cuba elkartearen eta Cuba Informacion aldizkariaren arduradunen kontra egiten ari diren epaiketa salatzeko. 

Carmelo Barrioren (PP) ahotan, luzea tradizio luzea du EAEko herritarrek elkartasunaren eta Saharako herriaren aldeko konpromisoak. Azkenik, Amaia Martinezek (Vox) bere kontrako botoa justifikatu du esanez Estatuko legea baino ez dutela babesten alderdi ultraeskuindarrak. 

Ekairen omenez, azken legea

Azkenik, transexualitatearen legearen erreforma egun seinalatuan heldu da Legebiltzarrera. Izan ere, sei urte dira Ekai nerabe transexualak bere buruaz beste egin zuena, tratamendu hormonalaren zain zegoela. Naizen ume transexualen familien elkartea ganberan izan da, bilkura jarraitzen. 

Arauaren erreforma EAJk, PSE-EEk eta Elkarrekin Podemosek sinatutako lege-proposamen gisa iritsi da Legebiltzarrera, eta eztabaidan EH Bilduren babesa ere jaso du. PPk kontra bozkatu du eta Voxek ez du bozketan parte hartu.

Legea onartu ondoren, Naizen, Errespetuz eta gainerako elkarteetako ordezkariek txalo zaparrada luze bat egin dute eta banderak erakutsi dituzte.

"Lege hau ez da inoren aurka onartzen, pertsonen alde baizik. Ez du inor ezabatzen, onartu egiten du, azpimarratu du Iñigo Iturrate EAJko legebiltzarkideak.

Ikoitz Arrese EH Bilduko legebiltzarkideak esan du araua "hobetu" daitekeela, baina "oso lege ona" dela, trans pertsonak "eskubide osoko pertsonak" bihurtzen dituelako.

Gloria Sanchez sozialistak gizartean zaurgarritasun egoeran dauden pertsonen aurkako "diskurtso publikoei" adi egoteko deia egin du.

Elkarrekin Podemos-IUtik, Miren Gorrotxategik esan due legeak kolektibo horri laguntzea espero duela, "haurtzaroaz eta gaztetasunaz lotsarik gabe eta harrotasunez goza dezaten".

Laura Garrido PPko legebiltzarkideak azpimarratu du bere taldea pertsonen eskubideak indartzearen alde dagoela, baina popularren ustez, arauak "segurtasun juridiko falta eta nahasmen handiagoa" ekarriko duela.

Hiru horiek onartuta, 59 dira guztira Eusko Legebiltzarrak legealdi honetan aurrera ateratako legeak. Onartutako legeen % 75 oposizioaren talderen baten babesarekin onetsi dute. Bada, dena den, hurrengo legegintzaldirako geratuko den araudirik: Gardentasunaren lege egitasmoaren izapidetzea hilabete hasieran abiatu zuen ganberak, eta ia ziurra da ez dela hura onartzeko astirik izango.