Euskadi % 10era iritsi da lehen aldiz positiboen tasan
Azken orduotan 1.461 COVID-19 kasu zenbatu dituzte Euskadin, eta positiboen portzentajea % 10ekoa izan da lehen aldiz; aldi berean, Araba eta Gasteiz beste lurraldeak eta hiriburuak zeuden gune gorrian sartu dira.
Positiboen portzentajea % 9tik gorakoa izan da behin baino gehiagotan (tasarik altuenak abuztuaren 23an izan ziren, % 9,6rekin, eta joan den larunbatean, % 9,5ekin), baina inoiz ez da iritsi % 10eko mugara, orain arte.
Datu horiek Eusko Jaurlaritzako Osasun Sailaren aurreko txosten epidemiologikoaren zifrak baino okerragoak dira, 1.425 kasu berri eta % 9,1eko positibo tasa atzeman baitzituzten asteartean.
Euskadiko ospitaleen egoerak okerrera egiten jarraitzen du, atzo 76 pertsona ospitaleratu ondoren. Guztira, 573 gaixo daude ospitaleratuta (16 gehiago) eta zainketa intentsiboetako unitateetan COVID-19a duten 111 paziente dituzte, hau da, bezperan baino 4 gehiago.
Atzo 14.668 test diagnostiko egin zituzten Euskadin, eta 1.461 positibo atzeman zituzten, bezperan baino 36 gehiago. Asteazkenean, Gipuzkoan izan ziren kutsatze gehien (671, 41 gehiago), Bizkaian (621, bi gutxiago) eta Araban (152, 11 gehiago) baino gehiago atzeman baitzituzten lurralde horretan. Gainera, EAEtik kanpo bizi diren edo egoitza ezezaguna duten bederatzi lagunek positibo eman dute EAEn egindako testetan.
Asteazken honetan, lau udalerri gehitu dira 100.000 biztanleko 500 kasu baino gehiago pilatu dituztenen zerrendara, Gasteiz eta Laudio (Araban biztanle gehien dituzten bi herriak) eta Arrigorriaga eta Leioa (Bizkaia) batu ostean.
Gipuzkoan 33 udalerri daude, Bizkaian 25 eta Araban 3; beraz, autonomia-erkidego osoan 61 udalerri daude eremu gorrian.
Gasteiz zerrenda horretan sartzearekin batera, EAEko hiru hiriburuak daude atalase epidemiko horren gainetik.
Gaixo batek zenbat pertsona kutsa ditzakeen neurtzen duen R0 indizea 1,09 da.
Gotzone Sagardui Osasun sailburuak ohartarazi duenez, egoerak "kritikoa izaten jarraitzen du", eta gaur arratsaldean bilduko den Euskadiko Babes Zibileko Planaren (LABI) aholku-batzordeak duela 10 egun abiatutako prebentzio-neurriak "are gehiago gogortu" ditzakeela onartu du, pandemia eta presio asistentziala gorantz doazelako.
Euskadiko intzidentzia epidemiologikoaren bilakaera hemen kontsulta daiteke. Azken orduetan herriz herri zenbatutako positibo berriak azter daitezke, eta pandemia hasieratik atzemandako kasu guztiak eta adin taldeen araberako datuak ageri dira bertan.
Bi hildako izan dira Foru Erkidegoan
Koronabirus kasuek gora egin dute berriro Nafarroan, 400eko langa igarota; 420 positibo berri atzeman dituzte azken orduetan, 4.359 PCR eta antigenoen proba eginda. Kasuen kopuruak gora egin du, bezperan 340 izan baitziren, Nafarroako Osasun Publikoaren Institutuaren datuen arabera.
Atzoko 420 kasu berriek % 9,6ko positibo tasa dute, aurreko egunean baino puntu erdi gehiago, Foru Gobernuak Twitterren jakinarazi duenez.
Ikuspegi epidemiologikotik, pandemiaren bilakaerari dagokionez, Nafarroako Osasun Publikoaren eta Lan Osasunaren Institutuaren arabera, atzo gaixotasun horrekin lotutako 25 gaixo ospitaleratu zituzten Nafarroan, horietako bat zainketa intentsiboetako unitatean, eta bi gaixo hil dira: 63 urteko gizon bat eta 89 urteko emakume bat. Horiek ere zenbatuta, guztira 739 pertsona hil dira.
Positiboen % 51 Iruñerrian erregistratu dituzte; Lizarran, % 18, eta Tuteran, % 11. Gainerako positiboak (% 20) Nafarroako beste eremu batzuetan atzeman dituzte.
Kasu gehiago pilatzen dituzten udalerri edo auzoei dagokienez, aipatzekoak dira Vianan 39 kasu atzeman dituztela, agerraldia egon baita adinekoen egoitza batean. Gainerakoan, lehenengo postuetan ohikoak diren Arrotxapea eta Txantrea Iruñeko auzoak daude zerrendan bigarren eta hirugarren (15 eta 14 kasu, hurrenez hurren). Ribaforadan 14 atzeman dituzte, eta Burlatan, 13.
Erregistratutako kasuen banaketari dagokionez, adin-tarteen arabera, talde handiena 30 eta 44 urte artekoa da (% 23), eta ondoren, 45 eta 59 urte artekoa (% 21). Jarraian, 15 urtetik beherakoak daude (% 19), 75 urtetik gorakoak (% 14), 60 eta 75 urte bitartekoak (% 10) eta, azkenik, 15 eta 29 urte bitartekoak (% 13). Kasu berrien batez besteko adina 42,3 urtekoa da.
Generoari dagokionez, kasuen % 53 emakumeak dira eta % 47 gizonak.
Ospitale-okupazioaren ikuspegitik, Osasunbidea-Nafarroako Osasun Zerbitzuak jakinarazi duenez, ospitaleratzeen eta alten balantzearen ondoren, 420 pertsona daude ospitaleratuta COVID-19arekin (atzo baino 4 gehiago), horietatik 61 zainketa intentsiboetan daude (atzo baino bat gehiago) eta beste 69 etxeko ospitalizazioan (bat gehiago). Gainerako 290 gaixoak gela arruntetan daude.
Atzoko positiboak gehituta, eta asteazken honetan Osasun Ministerioak datuak eguneratu ostean, birusak eragindako infekzioen intzidentzia metatua 35.210ekoa da Nafarroan, eguneroko datuen arabera.
Santos Indurain Osasun sailburuaren hitzetan, urtea amaitu baino lehen "berehalako ekintza-plan bat" egingo dute, aurrekontu egokiarekin, Lehen Mailako Arreta indartzeko, koronabirusaren pandemiaren pisuaren zati handi bat jasaten duelako.
Erkidegoek 21.908 COVID-19 kasu gehiago jakinarazi dizkiote Espainiako Osasun Ministerioari ostegun honetan, eta horietatik 9.606 diagnostikatu dituzte azken 24 orduetan; asteazkenean, berriz, 8.924 izan ziren, eta koronabirusak guztira kutsatutako pertsonen kopurua 1.306.316ra igo da. Espainiako Estatuan azken 14 egunetan 100.000 biztanleko 527,30 kasura igo da inzidentzia tasa.
Hildako kopuruari dagokionez, Salvador Illa buru duen departamentuak 368 gehiago jakinarazi ditu, 1.002 azken astean. Ondorioz, Estatuan 38.486 pertsona hil dira koronabirusak jota.
Ikastetxeen egoera
EAEko ikastetxeei dagokienez, 149 ikasgela itxi dituzte, bezperan baino 17 gehiago, hau da, 2 urtetik derrigorrezko unibertsitatez kanpoko irakaskuntzara arteko eskolen % 0,85. Erkidegoko 96 ikastetxek dute ikasgelaren bat itxita, bezperan baino 5 gehiago dira, eta ikastetxe bat bera ere ez dute erabat itxi.
Bestalde, Gipuzkoako adinekoen egoitzek 23 positibo atzeman dituzte azken orduetan, beste bi adinekok gaixotasuna gainditu dute, eta ez da inor hil COVID-19ak jota.
Kutsatze berriak honako zentro hauetan izan dira: Errenteriako Jesusen Bihotza (17); Alai Etxe (2), Julian Rezola (1) eta Villa Sacramento (1), Donostian; Beasaingo Arangoitin (1); eta Irungo Caser Residencial Anakan (1).
Gaixotasuna gainditu duten bi egoiliarrak Gipuzkoako hiriburuko Berra eta Lamorous zentroetakoak dira, Foru Aldundiak ohar baten bidez jakinarazi duenez.
Hiru dira ospitaleratuta dauden pertsonak, eta beste 85 kasu horietarako erreferentziazko bi zentroetan daude, Eibarko Ospitaleko gizarte-solairuan eta Ordiziako San Jose zentroan.
Abuztuaren 11n bigarren olatuko lehen positiboak atzeman zituztenetik, 112 adinekok gainditu dute gaixotasuna eta 47 pertsona hil dira, Foru Aldundiak gogorarazi duenez.
Zure interesekoa izan daiteke
Maialen Mazon hiltzeagatik akusatutako gizonak biktimaren odol orbanak zituen arropetan
Ostiral honetan egin da Arabako Probintzia Auzitegian ustezko hiltzailearen aurkako epaiketaren bosgarren saioa. Auzipetuaren arroparen hainbat lagin aztertzeaz arduratu ziren Ertzaintzako bi adituk deklaratu dute gaur. Zehazki, haren galtzetan zegoen orban bat, eta alkandoran eta zapatiletan zituen orban batzuk ikertu dituzte, eta ondorioztatu dute odol orbanak zirela eta odol hori Mazonen DNArekin bat zetorrela.
EHUk graduazio ekitaldi bateratua egingo du San Mamesen, ekainaren 12an
Ikasleek dagoeneko izena eman dezakete, doan. Halaber, ikasleen senide eta hurbilekoek arratsaldetik aurrera erosi ahalko dituzte sarrerak, 19 euroan, EHUren webgunean.
Lukas Agirre hiltzeaz akusatutakoen "errugabetasun presuntzioa suntsitzeko zantzu nahikoak" ikusten ditu fiskalak
2022ko Gabonetan gertatu zen krimenaz akusatuta, hiru pertsona eseriko dira aulkian: hilketaren ustezko egilea, beharrezko laguntzailea (hiltzaileari labana eman ziona) eta krimena estali zuen neska bat. Gaur osatuta geratuko da herri epaimahaia, eta astelehenean hasiko da epaiketa bera, aurretiazko gaiak aztertuta. Fiskaltzak eta akusazio partikularrak 22 eta 25 urte arteko kartzela zigorra eskatzen dute.
Eusko Jaurlaritzak Gaixotasun Infekzioso Emergenteen Aholku Batzordea aktibatu du hantabirusak eragindako alerta hurbiletik jarraitzeko
Gontzal Tamayo Osasun sailburuordea buru duen organoak bere lehen azalpenak eman ditu MV Hondius ontziaren egoera aztertu ondoren, eta lasaitasunerako mezua helarazi nahi izan du, Euskadin arriskua oso txikia dela goraipatuz; Osakidetzak, berriz, Donostia Unibertsitate Ospitaleko Goi Mailako Isolamendu eta Tratamenduko Unitatea operatibo eta prest du edozein gorabeherari aurre egiteko.
Igorreko Udalak loteriaren saria kobratu ez dutenen arazoa "lehenbailehen" konpontzea espero du
Gabonetako Loterian saria egokitu eta kobratu ezinik geratu diren ehundik gora lagunen salaketak jaso ditu jada Ertzaintzak. Igorreko errugbi taldeak iruzurra egin duen argitzeko ikerketa martxan da.
10 salaketa eta 3 gazte ikerketapean Arabako 100 bat adingabek egindako ikasbidaiaren auzian
Bartzelonako Guardia Zibila ari da ikerketa zuzentzen, polizia judizial gisa, eta kasua Bartzelonako Guardiako Epaitegira bidali dute. Zenbait adingabe eta lekukori deklarazioa hartu diete jada, ikastetxe horietako ikasleak ez ziren bidaiariak ere joan zirelako itsas bidaian.
52 apaizek Juan Carlos Elizalde gotzainaren aurka egin dute, “agintekeriaz” jokatzea leporatuta
Apaizetako baten arabera, seminarioaren “erdia kikoen esku” utzi du gotzainak. Elizalderen esanetan, apaiz batzuek “denbora gehiegi dute inkordiatzeko”.
Albiste izango dira: Duranako ikasturte amaierako bidaia, hantabirus agerraldia gurutzaontzian eta Igorren loteriaren saria kobratu ez dutenak
Gaurkoan Orain-en albiste izango direnen laburpena, bi hitzetan.
Dagoeneko 107 dira Arratiko Zekorrak taldeak saldutako loteria txartelen auzian salaketa jarri duten herritarrak
Behar baino 225 partaidetza gehiago saldu zituela aitortu du Arratiko Zekorrak errugbi taldeak. 2,2 milioi euroko zuloa dago, saritutako txartel bakoitzari 9.600 euro dagozkio eta. Kaltetuak plataforma batean elkartzekotan dira.
Arratiko Zekorrak taldeak saldutako loteria txartelen auzian kaltetutakoen artean ziurgabetasuna eta haserrea da nagusi
Igorreko errugbi klubari loteria-partaidetzak erosi eta Gabonetako zozketan sarituak gertatu ostean, dagozkien diru-kopurua jaso ez duten kaltetuek haserre eta ziurgabetasun handiz bizi dute egoera. Dagoeneko salaketak jarri dituzte, eta gehienek uste dute iruzur egin dietela.