Intzidentzia metatua 300era iritsi da EAEn eta gora egin du ospitaleratuen kopuruak ere

100.000 biztanleko 300 kasutara iritsi da Covid-19aren intzidentzia metatua Euskal Autonomia Erkidegoan, azken astean 4.038 koronabirus kasu zenbatu ondotik. 

Iragan astean bost lagun hil dira covid-19aren ondorioz eta pandemia hasi zenetik 4.839 dira koronabirusaren erruz hil direnak. 

Eusko Jaurlaritzako Osasun Sailak gaur argitara eman duen txosten epidemiologikoaren arabera, igandean 168 pertsona zeuden ospitaleetan, duela astebete baino 54 gehiago. Halere, ZIUako gaixoen kopuruak ez du gora egin eta hogeita hamarren bueltan jarraitzen du; atzo, zehazki, 31 lagun zeuden ZIUtan. 

Egoera zailena Gipuzkoan dago, bertan, intzidentzia metatua 100.000 biztanleko 510 kasuraino igo da. Araban, intzidentzia 174 kasukoa da, eta 197koa Bizkaian.

Adin-tarteen arabera, 0-9 urte bitarteko haurren artean dago une honetan intzidentzia metatu handiena. Atzo 94 kasu zenbatu zituzten talde horretan, eta 14 eguneko intzidentzia 100.000 biztanleko 472 kasutan dago. 10 eta 19 urte bitarteko taldean 62 kasu detektatu ziren (15 positibo 13 eta 18 urte bitarteko pertsonen artean), eta intzidentzia 357 kasutara iritsi zen.

Eusko Jaurlaritzako Hezkuntza Sailak jakitera eman duenez, adingabeen artean dagoen intzidentzia handiaren ondorioz, une honetan 98 gela daude itxita EAEko 60 ikastetxetan. Zifra horiek ia hirukoiztu egiten dituzte duela astebetekoak, joan den astelehenean 35 baitziren itxitako gelak, 21 ikastetxetan. .

Halaber, nabarmentzekoa da 40 eta 49 urte bitarteko kolektiboan izandako positibo kopurua. Atzo 101 kasu atzeman zituen talde horretan, eta pilatutako intzidentzia 400 ingurukoa da (393 kasu 100.000 biztanleko).

Oinarrizko birsorkuntza-tasa, hau da, positibo eman duen pertsona bakoitzak kutsatzen duen pertsona-kopurua erakusten duen tasa, jaitsi egin da azken egunetan; joan den ostegunean 1,35ean zegoen, eta atzo, 1,26an.

Covid pasaportea baztertua

EAEko Justizia Auzitegi Nagusiak uko egin dio, aldeko boto bat eta kontrako birekin, jatetxeetan eta gaueko aisialdiko zenbait jardueratan covid pasaportea eskatzeko Eusko Jaurlaritzak eskatutako baimen judiziala emateari.

Eusko Jaurlaritzaren asmoa zen covid pasaportearen derrigortasuna ezartzea 50 mahaikide baino gehiagorentzako lekua duten jatetxeetan, baita diskoteketan, dantzalekuetan, ikuskizunak dituzten dantzalekuetan, musika-tabernetan eta karaokeetan ere, baita pubetan eta taberna berezietan ere, baldin eta udalerrian 100.000 biztanleko 150 kasu baino gehiago badaude 14 egunetan.

Epaileentzat, zuzenbide-estatu batean, helburuak ezin ditu bitartekoak arrazoitu, eta, kasu honetan, neurriak oinarrizko eskubide askori eragiten diela uste dute: berdintasuna eta intimitatea, biltzeko eskubidea, edozein pertsonak leku publikoetan sartzeko eskubidea, edo karaokeetan, adibidez, landu daitekeen sorkuntza artistikorako eskubidea.

Auzitegi Gorenean helegite jarri ahal izango zaio ebazpenari, hura jakinarazi eta hiru eguneko epean.

12 urtetik beherakoen txertaketa

Ikusteko dago ondorengo egunetan Sendagaien Europako Agentziak (EMA) zer erabaki hartuko duen 5 eta 11 urte bitartekoen txertaketaren aurrean, baina sailburuak argi du: "Lortzen denean, farmaziak txertoa banatzen hasiko dira, Europako herrialdeen arteko akordioan oinarrituta".

Hori noiz izango den ez badaki ere, "txertoak abenduan baditugu, abenduan hasiko gara, eta aurrerago badatoz, bada, aurrerago. Baina ziurtatu arte itxaron behar dugu, eta gero konpainiak banatzeari ekin ", azaldu du.

Ildo horretan, Sagarduik azpimarratu du koronabirusak 6 eta 11 urte bitarteko adin-tartean duen eragina batez besteko orokorrean baino "dezente handiagoa" dela, eta, horregatik, adingabe horiei txertoa jartzea "garrantzitsua" dela esan du, "babes handiagoa ematen diegulako"; izan ere, "gehienek gaixotasuna hobeto pasatzen badute ere, arriskua dute, eta adin tarte horretako adingabeak ospitaletan eta ZIUetan ditugu".

Hirugarren dosia

Osasun sailburuak ziurtatu duenez, Euskadik "nahikoa txerto" ditu "lehenengo, bigarren edo hirugarren dosiak" jartzeko, eta "gehiago beharko bagenitu, eskatu egingo genituzke", erantsi du.

Hala, herritarren % 90ek baino gehiagok txertoa jarri zutenetik, txertoak astero bidaltzeko maiztasuna aldatu egin dela azaldu du, eta orain "behar diren neurrian" eskatzen direla azaldu du.