EAJk lehenengo postua berreskuratuko luke hauteskunde orokorretan Euskadin
Eusko Alderdi Jeltzaleak irabaziko lituzke apirilaren 28ko hauteskunde orokorretan Euskal Autonomia Erkidegoan, botoen % 28,5 eta sei diputatu lortuta.
Hamabigarren EiTB Focus inkestaren lehenengo olatuak 2019ko martxoko datuak eman ditu, Espainiako Diputatuen Kongresurako eta Senaturako hauteskundeen aurrean EAEn dagoen boto-asmoaren ingurukoak, besteak beste.
Inkestaren datuen arabera, EAJk eserleku bat irabaziko luke, eta aurreko hauteskundeetan irabazi zuen Podemosen eta Ezker Batuaren arteko koalizioa (Elkarrekin Podemos) gaindituko luke; koalizioa bigarren geratuko litzateke orain. EH Bilduk emaitzak hobetuko lituzke, diputatu bat gehiago lortuta. Pedro Sanchezen eraginak PSE-EEren emaitzak hobetuko lituzke Euskadin, eta Casadoren PPk inoizko daturik kaskarrenak eskuratuko lituzke.
Boto-asmoa EAEn
EAJ izango litzateke EAEko alderdi bozkatuena, botoen % 28,5 eskuratuta (3 puntutik gorako igoera). Atzetik, Elkarrekin Podemos bigarren postuan geratuko litzateke, botoen % 20,7 jasota (ia 9 puntuko jaitsiera).
Koalizio horretatik gertu, hirugarren postuan, PSE-EE geratuko litzateke, botoen % 20 lortuta (ia 6 puntuko igoera). EH Bildu litzateke EAEko laugarren indarra, botoen % 15,6 bereganatuta (aurrekoetan baino 2 puntu gehiago). Bosgarren eta azken tokian, PPk botoen % 9,7 eskuratuko lituzke (ia 3 puntu galduko lituzke).
EAEko eserlekuen estimazioa
2016ko hauteskundeetan baino diputatu bat gehiago eskuratuko lituzke EAJk, 6 ordezkari izango balituzke, datuak baieztatuz gero. Elkarrekin Podemos 6 diputatu izatetik 4 izatera pasatuko litzateke, eta PSE-EEk ere 4 diputatu eskuratuko lituzke (aurrekoetan baino bat gehiago).
EH Bilduk ere diputatu bat irabaziko luke datuak 2016ko emaitzekin alderatuta, eta 2 izatetik 3 izatera igaroko litzateke. PPk, ordea, egunn dituen bi diputatuetako bat galduko luke, eta EAEko ordezkari gisa diputatu bakarra izango luke Kongresuan.
Ciudadanosek eta Voxek ez lukete Diputatuen Kongresuan EAEko ordezkaririk lortuko.
Arabako eserlekuen estimazioa
Araban dago agertoki estuena. Elkarrekin Podemosek eta PPk botoak galduko lituzkete eta EAJk, PSOEk eta EH Bilduk gora egingo lukete, baina Arabako diputatuen banaketa ez litzateke aldatuko.
Elkarrekin Podemosek, EAJk, PSE-EEk eta PPk eserleku bana izango lukete, eta EH Bilduk ordezkaritzarik gabe jarraituko luke, Ciudadanosek eta Voxek bezala.
Bizkaiko eserlekuen estimazioa
Bizkaian, EAJk 3 diputatu lortuko lituzke (egun baino bat gehiago). PSE-EEk ere 2 diputatu eskuratuko lituzkete (bat irabaziko luke), eta Elkarrekin Podemosek ordezkari bat galduko luke; 3 diputatu izatetik 2 izatera pasatuko litzateke.
EH Bilduk egun duen ordezkariari eutsiko lioke, eta PPk galdu egingo luke gaur egun duen bakarra, eta, lehenengo aldiz, ez luke diputaturik eskuratuko lurraldean.
Gipuzkoako eserlekuen estimazioa
Gipuzkoan, EAJk lehenengo postua berreskuratuko luke, 2 diputatu lortuta; EH Bilduk ere kopuru bera izango luke (2 eserleku), bat irabazita, eta Elkarrekin Podemos aurreratuko luke.
Moreek ordezkari bat galduko lukete, 2 diputatu izatetik 1 izatera igarota, eta PSE-EEk laugarren indarra izaten jarraituko luke, ordezkari batekin. PPk, Ciudadanosek eta Voxek ez lukete Gipuzkoan ordezkaririk lortuko.
Buruzagi politikoen balorazioa
Aitor Esteban (EAJ) da buruzagi politiko baloratuena, 6,4ko nota jarri baitiote. Hurrengoa, Marian Beitialarrangoitia (EH Bildu), ia puntu batera dago, 5,5eko notarekin, eta Pedro Sanchez (PSOE) dago hirugarren, 5,1ekoarekin.
Diputatu abertzaleak eta Espainiako Gobernuko presidentea dira EAEko herritarren azterketa gainditu duten bakarrak. Ondoren, Pablo Iglesias (Elkarrekin Podemos) dago gertuen, 4,8ko notarekin. Espainiar eskuineko alderdietako buruzagiak dira okerren baloratu dituztenak: Albert Rivera (Ciudadanos), 1,9ko notarekin; Pablo Casado (PP), 1,6koarekin, eta Santiago Abascal (Vox), 0,7koarekin.
Espainiako Estaturako aurreikuspenak
Euskadiko herritarren gehiengo zabalaren ustez, PSOE izango da alderdi bozkatuena Espainian. Galdetutakoen % 61,4k uste dute sozialistek irabaziko dituztela hauteskunde orokorrak.
Bestalde, % 12,7k baino ez dute pentsatzen PP izango dela alderdi bozkatuena.
Hala ere, galdetutako ia laurden batek ez daki edo ez du erantzun.
Hauteskundeen ostean Gobernua osatzeko sor daitezkeen balizko bi koalizioetako zein nahiago luketen galdetuta, EAEko 10 herritarretik 9k (% 86,3) nahiago dute PSOEk, Podemosek eta alderdi abertzaleek osatu ahalko luketena.
Galdetutakoen % 4,1ek nahiago lukete koalizioa PP, Ciudadanos eta Vox alderdiek osatzea, eta ia % 10ek ez dakite zer erantzun edo nahiago dute erantzunik ez eman.
Vox Kongresuan
EAEko herritarren % 84,5i gaizki edo oso gaizki iruditzen zaie Vox Diputatuen Kongresuan sartzea. % 67,1 dira, gainera, aukera horri oso gaizki deritzotenak.
Talde horren barruan, galdetutakoen % 67,9 eskuin muturreko ideologia duelako daude Santiago Abascalen alderdiaren aurka.
Zure interesekoa izan daiteke
Eusko Legebiltzarrak lan eskaintza publikoetan euskararen babesa indartzeko erreforma onartu du
Euskal Enplegu Publikoaren Legearen aldaketak, EAJk bultzatua, hizkuntza eskakizunen segurtasun juridikoa indartu nahi du. Testua aurrera atera da EAJren babesarekin eta EH Bilduren abstentzioarekin, eta PSEk, Eusko Jaurlaritzako EAJren bazkideak, kontrako botoa eman du.
Polizia gehiegikerien legea erreformatzeko eskatu du Egiari Zor elkarteak, biktima bakar bat ere "baztertuta" gera ez dadin
Epez kanpo izapidetzeagatik ezetsi zituzten 500 onarpen-eskaera helarazi dizkio fundazioak Eusko Jaurlaritzari.
Hitz gogorrak izan dituzte Feijook eta Patxi Lopezek Kongresuan
PPko buruak PSOEren bozeramailearen aita aipatu du oholtzan, eta hark erantzun dio alderdiaren sortzailea "torturatu eta erbesteratu zuen diktadurako gobernuaren" parte zela.
Begoña Gomezek pasaportea eman du epaitegian, epaileak eskatuta
Epaileak kautelazko neurri gisa kendu dio, bere aurkako ahozko epaiketa ireki baitu, lau delitu posiblerengatik, negozioetako ustelkeria barne.
EAJk eta EH Bilduk akordioa lortu dute enplegu publikoaren legearen erreforma aurrera ateratzeko
EH Bilduk abstentzioa emango du bihar, osteguna, Legebiltzarrean. Modu horretara, EAJk bultzatutako legearen aldaketa onartzea ahalbidetuko du. Horrez gainera, hiru urteko epean, legearen aplikazioari eta eraginkortasunari jarraipen bateratua egitea ere adostu dute bi taldeek.
Feijook hauteskundeak deitzeko eskatu dio beste behin Sanchezi: "Zu zara ustelen arteko lotura politikoa"
Euren agerraldietan, EH Bildu eta EAJ kritiko agertu dira Espainiako Gobernuarekin, eta legealdiari zentzua emateko eskatu diote Pedro Sanchez presidenteari.
Sanchezen esanetan, ustelak ezin dira zigorgabe geratu, "edonor izanda ere"
Espainiako Gobernuko presidenteak errespetua agertu du asteazken honetan Auzitegi Gorenak Jose Luis Abalos ministro ohiaren aurka emandako epaiari, eta ziurtatu du "inoiz ez" zuela izan Gobernuko eta alderdiko zenbait kideri eragiten dieten praktika ustelen berri, eta jakin izan balu, ez lituzkeela onartuko.
Moncloak azpimarratu du batzuek "huts egin" diotela Sanchezi eta ez duela dimisioa eman beharrik
Astelehen honetan, Alberto Nuñez Feijoo PPko buruzagiak Espainiako Gobernuko presidentearen dimisioa eskatu zuen berriro ere, Auzitegi Gorenak Abalosi 24 urteko kartzela-zigorra ezarri ostean.
Froga batzuen abal judiziala egiaztatzen ez bada, kasua baliogabea izatea planteatu du Zapaterok
Espainiako Gobernuko presidente ohiak hainbat idatzi igorri dizkio epaileari, Plus Ultra airelinearen erreskatearen inguruko eraginen trafikoko sare baten ustezko buruzagi moduan ikertu gisa deklaratu ostean.
Pradales: "Asko dago egiteko; bide orriak euskal agendan sakontzea dakar"
Lehendakariak agintaldiaren lehen erdiaren balantzea egin du Ajuria Enean, ekitaldi instituzional batean. Bere hitzaldian, Euskadin lantzen den egonkortasuna nabarmendu du, "oso ezegonkorra" den testuinguru globalean aurrerapena, ongizatea eta autogobernua bermatzeko faktore erabakigarri gisa.