Iriartek "lidergo berriak" nahi ditu, "politika zaharrek balio ez dutelako"

“Lidergo berri eta guztien artean eraikitako adostasunak” bilatzeko “prest” daudela adierazi du Maddalen Iriarte EH Bilduko lehendakarigaiak. Egun “politika zaharrek ez dute balio dagoeneko”, ohartarazi du.

Mikel Otero eta Jasone Agirre Arabako eta Bizkaiko zerrendaburuek, hurrenez hurren, Iriarte lagundu dute Oñatin (Gipuzkoa). EH Bilduko lehendakarigaiaren hitzetan, COVID-19 pandemiarekin gertatutakoa ezin da ahaztu eta “etorkizunerako ikusmoldea” eman behar du. “Inor atzean uzten ez duten gobernatzeko modu berrien” aldeko apustua egin du koalizioko ordezkariak.

Zentzu horretan, gaixotasunak berak egindako kalteaz gain, beste ondorio batzuk utziko ditu: “lanpostuen galera, aldi baterako lan-erregulazioak, seme-alabak zaindu behar dituzten gurasoak etxetik lanean, bisitarik jasotzen ez duten euskal presoak eta egun batetik bestera lan egiteko modua aldatu behar izan duten milaka irakasle”. “Krisi soziala dago, erantzun berriak eman behar dira”, esan du koalizioko zerrendaburuak.

Iriarteren ahotan, osasun, ekonomia eta gizartean “zalantza” nagusi den garai hauetan, EH Bilduk “jendearen egoera hobetzeko benetako irtenbideak” proposatuko ditu.

“Hauteskundeak jendearen bizitza hobetzeko bide bat dira”, azpimarratu du. Horregatik, Iñigo Urkullu lehendakaria kritikatu du, “agorturik dagoelako, bakarrik, azken astean ia desagerturik, nagikeriaz, autokritikarako gaitasunik gabe eta bere hanka-sartzeak harrokeriarekin estaliz”.

Iriarteren esanetan, “esku ona” izan behar da, pertsonak “beldurra edo kezka dutelako, lanpostua gal dezaketelako, Hezkuntza Sailak azaldutako kontrol faltarekin haserre daudelako, Osakidetza indartsuago bat nahi dutelako”. “Garai berri baten aurrean gaude, arazo eta aukera berriekin”, erantsi du.

Testuinguru honetan, “iraganeko nagikeriak eta politika zaharkituak” alde batera utzi behar dituztela uste du EH Bilduko lehendakarigaiak. “Lidergo berriak eta guztien artean eraikitako adostasunak behar ditugu”, gaineratu du. “Kultura politiko berri bat, gauzak beste era batera egin, jendea kontuan hartu ematen dugun pauso bakoitzean”, nabarmendu duenez.

“Lidergo berriak eta adostasun berriak hitz egiteko, entzuteko, laguntzeko, lasaitzeko, enpatia izateko, bultzatzeko, berreraikitzeko eta batez ere hunkitzeko; EH Bildun horretarako prest gaude”, adierazi du. Azkenik, COVID-19 krisian zehar euskal gizarteak “modu eredugarrian” jokatu duela uste du Iriartek, eta erakunde publikoek “erronkaren aurrean maila eman behar dute, eta erantzukizunez jardun”.