Bexen Medical enpresa gipuzkoarrak 10 milioi maskara ekoitziko ditu hilean
Apiriletik aurrera hilero 10 milioi maskara kirurgiko ekoiztea aurreikusi du Mondragon Korporazioko kide den Bexen Medical kooperatiba gipuzkoarrak. Horrela, Hernanin egoitza duen konpainia hori Estatuko maskara-fabrikarik garrantzitsuena izango da.
Carlos Arsuaga Bexen Medicaleko zuzendari nagusiak azaldu duenez, enpresak erabilera bakarreko osasun arloko hainbat produktu ekoizten ditu, baina ez maskarak. Dena dela, sektorean 42tik gorako esperientzia dutenez, martxoaren 13an Medikamentuen Espainiako Agentziako zuzendari nagusia harremanetan jarri zen berarekin, maskarak, mantalak eta babes sanitarioko gainerako materiala ekoitzi ote zezaketen galdetzeko.
Testuinguru horretan, ordea, Bexen Medicalek ez dituela horrelako produktuak ekoizten azaldu zion Arsuagak, baina fabrikatzaile gisa enpresak duen esperientzia bere esku uzteko prest agertu zen, eta jakinarazi zion Mondragon Korporazioko beste enpresa batek, Mondragon Assemblyk (egoitza Aretxabaletan du), maskarak ekoizteko makinak egiten dituela Txinan.
Alabaina, Txinako produktuak merkatuan erosteko egun dauden zailtasunen berri eman zion Industria, Merkataritza eta Turismo Ministerioak Bexen Medicaleko arduradunari, eta estrategikoki maskarak estatuan bertan ekoizteko beharra dutela.
Hilaren 21ean Espainiako Gobernuarekin akordioa lortu ostean, maskarak ekoizteko lau makina egiten ari da Mondragon Assembly; bat Defentsa Ministerioarentzat, eta beste hirurak Bexen Medicalentzat, enpresa hernaniarrak maskarak egin ditzan.
Arsuagak adierazi duenez, 2R motako maskara kirurgikoak ekoitziko dituzte. Horiek hiru geruza dituzte, eta osasun arloan erabili ohi diren maskara kirurgikoen artean babes handiena dutenak dira. Hala ere, maskarak osatzen dituzten hiru lehengaietako bat aurkitzea "oso zaila" izaten ari dela aitortu du.
"Errusian hornitzaileak daude, baina Errusiako agintariek ez dute lehengai hori herrialdetik ateratzeko baimenik ematen, haiek behar dutenerako. Turkian eta Txinan ere hornitzaileak daude, baina, nolanahi ere, gertatzen ari den guztiarekin gainezka eginda daude", esan du Arsuagak.
Zailtasunak zailtasun, makinak Euskal Herrira ekarri eta beharrezko lehengaiak lortzeko lanean jarraitzen dutela azaldu du Arsuagak. "Dena ondo badoa, ziurrenik apirilaren amaieran maskara kirurgikoak ekoizten has gaitezke, eta, dena ondo badoa, hilean 10 milioi inguru ekoitzi ahalko ditugu, hiruzpalau txandatan lan eginez. Horrela, Estatuko maskara-fabrikatzaile garrantzitsuena izango gara", gaineratu du.
Hala, lantokia egokitzen dutenean, ahalik eta denbora gutxienean, ahalik eta maskara gehien ekoiztea da Bexen Medicalen helburua. Hori dela eta, aldi berean hiru makinekin izango dira lanean, eta hogei lanpostu inguru sortzea aurreikusten dute.
Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Kontseiluaren telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.
Albiste gehiago ekonomia
'La Suizako 6ak' erabat aske uzteko eskatu dute, hirugarren gradua lortu ostean
CNT sindikatuak elkarretaratzeak egin ditu Bilbon eta Donostian, 'La Suizako 6ak' ezizenez ezagun egin diren sei sindikalisten alde. Izan ere, bost emakume eta gizon bati kartzela zigorrak ezarri dizkiete Gijongo 'La Suiza' gozotegiaren aurrean, langile baten kaleratzearen aurka, protestak eta mobilizazioak egiteagatik.
Asteburuko greba bertan behera utzi dute Gipuzkoako Avanzako langileek
Langileek greba egiteko eskubiderako "gutxieneko baldintzak" betetzen ez direla deitoratu du enpresa-batzordeak.
BBK Live jaialdiak 23,6 milioi euro baino gehiago utzi ditu Bilbon
115.000 parte-hartzaileen artean, % 17 atzerritarrak dira, batez ere Erresuma Batutik, Frantziatik, Italiatik eta Portugaldik etorritakoak. Gainera, hotelen okupazioa % 90etik gorakoa izan da musika jaialdiak iraun duen bitartean.
ELAk eta LABek ziurtatu dute Torresek proposatutako gutxieneko soldataren igoerak 10.000 langileri bakarrik eragingo liekeela
Uste dute proposamenak ez dituela kontuan hartzen enpresek azken urteetan lortutako irabaziak, ezta beren plantillek sortzen duten produktibitatea ere, eta, horrenbestez, helburua ez dela "gizarte-kohesioa, ezta aberastasunaren banaketa justua ere".
BSHko langileek datorren astean bozkatuko dute lan- erregulazioko espedienteari buruzko aurreakordioa
Enpresa batzordearen gehiengoak (LABek eta ELAk, ez) aurreakordioa lortu du aste honetan zuzendaritzarekin, eta, horren arabera, lantegia itxi eta 609 pertsona kaleratuko dituzte. Langileen ordezkariek deituta, batzarrak egingo dituzte ostiral honetan, eta bozketa, ziurrenik, astelehenean egingo dute.
Langile bat hil da Gasteizen teilatu batetik erorita
Istripua asteartean gertatu zen, baina gaur eman da jakitera. Langilea 7 metroko altueratik erori zen.
Bruselak espedientea ireki dio Espainiari, BBVAk Sabadellen akzioak eskuratzeko operazioan erabilitako legeengatik
Europako Batzordearen ustez, kapitalen zirkulazio askearen aurkakoak dira Espainiako Gobernuak operazio hau baldintzatzeko erabili dituen legeak. Eta 2 hilabeteko epea eman diote Espainiako Gobernuari azalpenak emateko.
Portugalete eta Leioa lotuko dituen ibai azpiko errepideak 2026ko lehen seihilekoan hasiko dira, 543 milioiko aurrekontuarekin
Elixabete Etxanobe Bizkaiko diputatu nagusiak defendatu duenez, itsasadarraren azpiko tunela "ez da ez kapritxo bat, ezta burutazio bat ere", eta bai, ordea, lurraldearentzako "behar bat".
Euskal kostaldean udan pisua alokatzea gutxi batzuen eskura dagoen luxua bilakatu da
Opor garaiko alokairuen prezioak % 40 igo dira azken bost urteetan. Jabe askok etekin ekonomikoa bilatzen dute: nahiago dute alokairuen epeak laburtu eta diru-sarrerak handitzea.
Euskal ekonomia % 2,2 hazi da iaztik
Enpleguak % 1,4 egin du gora bigarren hiruhilekoan, Eustaten datuen arabera. Lehen hiruhilekoarekin alderatuta, igo egin dira bai BPGa (% 0,5), bai enplegua (% 0,3).