COVID-19 kasuen gorakada EAEn, 584 positibo atzeman dituzte azken 24 orduetan

Koronabirus kasuak areagotzen ari dira Euskal Autonomia Erkidegoan. 584 koronabirus infekzio kasu berri (bezperan baino 126 gehiago) agertu dira azken 24 orduetan 10.261 PCR eginda.

Lurraldeka, 80 kasu berri atzeman dira Araban, 260 Bizkaian, 243 Gipuzkoan, eta EAEtik kanpo bizi den pertsona baten kasua ere bai.

Positibitate tasa, egindako testetan atzemandako kutsatu tasa adierazten duena, % 5,59ean dago, MOEk gomendatzen duen %5ekoaren aren gainetik, alegia.

Ospitaleei dagokienez, 40 lagun ospitaleratu dituzten azken 24 orduetan COVID-19a dela eta, eta ZIUetan 45 pertsona daude une honetan.

Herriz herriko informazioa eta RO indizea astelehenean emango dira jakitera.

Nafarroan 2.588 PCR proba egin zituzten atzo, eta 463k positibo eman zuten ( % 17,9ko tasa). Gainera, hiru pertsona hil ziren: 81 urteko emakume bat, eta, 84 eta 75 urteko bi gizon. Datu horien aurrean, Nafarroako Gobernuak eskari argia egin die herritarrei kasuak gutxitzen hasteko: "asteburu luze hau autokonfinatuta igaro ezazue, mesedez".

Ikuspegi geografikotik, Iruñea eta Iruñerrian atzeman dituzte kasu berrien % 61, Tutera eta inguruetan % 12, eta Lizarraldean % 9.

Adin tarteei dagokienez, 15-29 bitartekoak % 23 izan dira, 45-59 artekoak % 21, 30-44koak %20, 15 urte baino gutxiagokoak % 16, 60-75 artekoak % 12 eta 75etik gorakoak % 8. Kasu berrien batezbesteko adina 39,7 urtekoa da.

Ospitaleetako egoerari dagokionez, atzo 24 ospitaleratze gehiago izan ziren, horietako 3 Zaintza Berezien Unitatean. Guztira, 256 pertsona daude ospitaleratuta une honetan (bezperan baino 3 gutxiago).