71 pertsona hil dira Euskadin azken astean, aurrekoan baino 28 gutxiago

Koronabirusak eraginda, 71 pertsona hil dira Euskadin azken astean, aurrekoan baino 28 lagun gutxiago, Eusko Jaurlaritzako Osasun Sailak emandako datuen arabera. Gainera, asistentzia-presioak ere joera positiboa du; izan ere, bederatzi gaixo gutxiago daude zainketa intentsiboetako unitateetan, eta 17 gutxiago, gela arruntetan ospitaleratuta.

Eguneko datuei dagokienez, asteartean 10.874 test diagnostiko egin zituzten, eta 499 positibo atzeman dituzte: 327 Bizkaian, 109 Gipuzkoan, 56 Araban eta zazpi EAEtik kanpokoak.

Horrela, positibotasun tasa % 4,6koa da, eta astelehenean, berriz, % 4,7koa.

Bi asteko intzidentzia-tasa metatuak behera egiten jarraitzen du, eta 424,83an dago. Hiru lurraldeek beheranzko joera dute: 100.000 biztanleko, Bizkaian 464,04 kasu izan dira, Araban 386,12 eta Gipuzkoan 361,99.

Bilbo da gune gorrian dagoen hiriburu bakarra, 100.000 biztanleko 506,5 kasurekin, eta Gasteizen eta Donostian kasuen kopuruak behera egin dute 422 eta 338,8raino, hurrenez hurren.

Oinarrizko ugalketa kopuruak ere beheranzko bilakaera du, asteartean 0,79koa izan baita, bezperan baino hamarren bat txikiagoa.

Asistentzia-presioa pixkanaka hobetzen ari da, azken orduetan 61 ospitaleratze izan badira ere (aurreko egunean baino bat gehiago). Asteartean, 421 pertsona zeuden ospitaleratuta, astelehenean baino 17 gutxiago, eta zainketa intentsiboetako unitateetan 168 gaixo izatetik 159 izatera pasatu dira.

Bestalde, otsailaren 8tik 14ra bitarteko astean metatutako datuen arabera, 71 gaixo hil dira (hamar pertsona inguru egunean) covid-19aren eraginez, joan den asteko 99 heriotzen azpitik eta azken lau asteetako kopururik baxuena.

Gune gorrian dauden 5.000 biztanletik gorako EAEko udalerriei dagokienez, 18 udalerri izatetik 15 izatera pasatu dira, eta Araban dagoeneko ez dago bat ere eremu gorrian.

Bizkaian, 10 herri daude egoera txarrenean (13 ziren bezperan), Basauri eta Gorliz atera eta Ondarroa sartu ondoren, Bilbo, Berango, Bermeo, Derio, Getxo, Gueñes, Leioa, Ondarroa, Santurtzi eta Sopelarekin batera.

Gipuzkoan, eremu gorrian dauden herriak 7 izatetik 6 izatera igaro dira Lasarte-Oriako egoera hobetu egin baita. Astigarraga, Bergara, Elgoibar, Legazpi, Lezo eta Oñati daude zerrenda horretan.