Positibotasunak behera egin du Euskadin, baina gaixo larrien kopuruak gora egin du ZIUetan

Igandean, 363 kutsatze atzeman dituzte Euskadin, aurreko egunean baino 177 gutxiago, eta positibotasuna % 8,9ra jaitsi da. Hala ere, EAEko ospitaleetan gaixoen kopuruak behera egiten jarraitzen dute, baina horietatik 82 gaixo zainketa intentsiboetako unitateetan daude; bosgarren olatuko kopururik altuena da.

Datuak lurraldez lurralde aztertuta, Araban 50 positibo hauteman dituzte, Bizkaian 200 eta Gipuzkoan 106, Eusko Jaurlaritzako Osasun Sailak astelehen honetan jakitera eman duenez.

Hain zuzen ere, gaitza atzemateko 4.083 proba diagnostiko egin zituzten atzo, eta 363 positibo berri atzeman zituzten. Ildo horretatik, positibotasun tasa % 8,9ra jaitsi da (larunbatean % 10,3koa zen) eta 100.000 biztanleko azken 14 egunetako intzidentzia-tasa metatua 434 kasukoa da. Ugalketa-indizea (R0), aldiz, 0,87an kokatu da.

Adin-tartearen arabera, gazteenak dira kaltetuenak; 20 eta 29 urte bitartekoen artean 1.168 kasuko intzidentzia-tasa metatua dago, 17 eta 18 urte bitartekoen atzetik, 1.413 kasu baitaude tarte horretan 100.000 biztanleko.

EAEko ospitaleetako egoerari dagokionez, 41 pertsona ospitaleratu behar izan zituzten atzo gela arruntetan (aurreko balantzean baino 10 gehiago), baina zainketa intentsiboetako unitateetan (ZIU) 82 gaixo daude une honetan covid-19arekin (bi gehiago). Ondorioz, 265 pertsona daude guztira ospitalean.

Bi hildako Gipuzkoako erresidentziatan

Bestalde, bi adineko hil dira covid-19arekin Gipuzkoako erresidentziatan, asteburuan, Foru Aldundiak jakinarazi duenez.

Oiartzungo Petra Lekuona eta Irungo Ama Xantalen egoitzetan izan dira heriotzak.

Une honetan, 43 pertsona daude kutsatuta Gipuzkoako zahar-etxeetan. Asteburuan ez dute positibo berririk antzeman.

Bosgarren olatu hasi zenetik bederatzi adineko hil dira guztira.

Arabako eta Bizkaiko foru aldundiek ez dute daturik eman.