EAEko 16 eta 19 urte bitarteko gazteen laurdenek pauta osoa dute jada

Euskal Autonomia Erkidegoan (EAE) bizi diren 1.509.568 pertsonari covid-19aren aurkako txertaketa pauta osoa jarri diete jada, hau da, 12 urtetik gorako herritarren % 76,3ri, Eusko Jaurlaritzako Osasun Sailak astelehen honetan jakitera eman duenez.

Txertaketaren inguruko datuak jasotzen dituen azken txostenaren arabera, 1.668.863 pertsonari koronabirusaren aurkako txertoaren dosi bat jarri diete dagoeneko; hain zuzen ere, 12 urte edo gehiagoko biztanleen % 84,3ri. Ostiralean, herritarren % 75,3k zuten pauta osoa eta % 83,4k dosi bat.

Asteburu honetan, beste bultzada bat eman diote gazteen txertaketari. 16 eta 19 urte bitarteko 20.500 gaztek dute jarraibide osoa, hau da, guztien % 25ek (ostiralean % 20k zuten).

Txertaketak ere gora egin du 12 eta 15 urte bitarteko adingabeen artean. Tarte horretan, ia % 45ek dosi bat dute (6,4 puntu gehiago), eta % 8,8k, pauta osoa (aurreko txostenean, % 6,6koa zen kopuru hori).

30 urtetik gorakoen artean, ehunekoak handiagoak dira. 30 eta 39 urte bitartekoen artean, % 77k txertoa jaso dute, eta % 66,2k pauta osoa dute. Halaber, 40 eta 49 urte arteko euskal herritarren % 88,2k bi dosiak dituzte, eta 50 urtetik gorakoen artean, berriz, % 90 baino gehiago dira pauta osoa dutenak.