EAEko zortzi udalerri daude eremu gorrian eta neurri berriak izango dituzte asteartetik

(OHARRA: Koronabirusaren semaforoa astean behin eguneratuko da aurrerantzean, astelehenero)

Zortzi udalerri daude eremu gorrian Euskal Autonomia Erkidegoan, covid-19ak EAEn herriz herri izan duen eragina neurtzeko Eusko Jaurlaritzako Osasun Sailak erabiltzen duen semaforoaren arabera. Agurain, Astigarraga, Azpeitia eta Zumarraga udalerriei Elorrio, Pasaia, Tolosa eta Urretxu gehitu zaizkie. Abadiño, berriz, eremu latzenetik irten da.

Testuinguru horretan, eta Eusko Jaurlaritzak iragarri bezala, astearte honetan ezagutuko ditugu covid-19aren eragin handia duten udalerri horietan hartuko diren neurri murriztaileak. Eusko Jaurlaritzako Osasun sailburuak aurreratu duenez, neurriak jende pilaketak saihestera bideratuko dira, eta herritarrak kontzientziatzera, "joera txarra geldiaraztea guztion lana" baita.

Araba gune horian dago (62 kasu), eta eremu berean dago Gasteiz. Amurrio eta Laudio, berriz, eremu berdean daude, eta Agurainek gorri jarraitzen du. Ez dago udalerririk eremu laranjan.

Bizkaiak eremu horiari eutsi dio, baina intzidentziak gora egiten jarraitzen du (120 kasu 100.000 biztanleko). Abadiño eremu gorritik kanpo dago, baina Elorrio sartu da bertan, azken egunetako intzidentzia altuagatik.

Laranjaz, berriz, Abadiño, Durango eta Zornotza daude.

Eremu horian, honako udalerri hauek daude: Balmaseda, Basauri, Bermeo, Bilbo, Erandio, Galdakao, Gernika-Lumo, Leioa, Mungia, Ondarroa, Ortuella, Trapagaran eta Zalla. Azken egunetan, baina, beste 12 udalerri sartu dira zerrendan: Barakaldo, Berango, Derio, Ermua, Etxebarri, Getxo, Gorliz, Lekeitio, Markina-Xemein, Portugalete, Santurtzi eta Sopela.

Zerrenda berdean, berriz, hauek daude: Abanto, Arrigorriaga, Gueñes, Muskiz eta Sestao.

Gipuzkoak horiz jarraitzen du, intzidentziak azken egunetan gora egin arren nabarmen, 100.000 biztanleko 308 kasu baitituzte bertan. Astigarragan, Azpetian eta Zumarragan gorri jarraitzen du semaforoak, eta, gaurtik aurrera, baita Pasaian, Tolosan eta Urretxun ere.

Eibar eta Elgoibar udalerri laranjak dira.

Andoain, Aretxabaleta, Arrasate, Azkoitia, Beasain, Bergara, Deba, Donostia, Eibar, Elgoibar, Hernani, Hondarribia, Irun, Lasarte-Oria, Legazpi, Lezo, Mutriku, Oiartzun, Oñati, Ordizia, Pasaia, Tolosa, Urnieta, Usurbil, Villabona, Zarautz eta Zumaia udalerri horiak dira. Lazkao, Errenteria eta Orio batu zaie zerrendara.

Amaitzeko, Debak bakarrik eutsi dio berdeari.

Europar Batasunak onartutako koloreen mapa egokitu du Jaurlaritzak, eta azken 14 egunetan metatutako intzidentzia-tasaren arabera sailkatzen ditu EAEko udalerriak.