Pasaia eremu gorrira itzuli da

Koronabirusaren intzidentzia-tasak gora egiten jarraitzen du Araban, behera Bizkaian eta Gipuzkoan, eta aldaketak izan dira koloreen semaforoa erabiliz sailkatutako udalerrien zerrendan. Hain zuzen ere, covid-19ak EAEn herriz herri izan duen eragina neurtzen du Eusko Jaurlaritzako Osasun Sailaren semaforoak.

Pasaia gune kritikora itzuli da, eremu laranjan egun bakarra igaro ondoren. Era berean, Agurainek eta Lasarte-Oriak atzerapausoa eman dute, eta laranjara itzuli dira. Zalla, ostera, gune horira igaro da, datu epidemiologikoak berriro hobetu dituelako. 5.000 biztanle baino gehiago dituzten 60 udalerri geratzen dira oraindik eremu gorrian. Horietako lautan, gainera, intzidentzia metatua 1.000 kasutik gorakoa da.

Atzo, 7.329 test diagnostiko egin zituzten, eta horietako 891k eman zuten positibo. Datuak lurraldez lurralde aztertuta, 182 positibo atzeman dituzte Araban, 466 Bizkaian, 220 Gipuzkoan eta 23 Euskaditik kanpo bizi diren pertsonetan. Ospitaleen egoera dela eta, covid-19a duten 47 pertsona ospitaleratu zituzten atzo, eta koronabirusa duten 62 gaixo daude ZIUn.

Arabak (552 kasu 100.000 biztanleko) eremu gorrian jarraitzen du, baita Gasteiz hiriburuak eta beste bi udalerri handik ere: Amurrio eta Laudio.

Agurain eremu laranjara itzuli da.

Horrenbestez, ez dago udalerri handirik eremu horian edo berdean Araban.

Bizkaia ere (618 kasu 100.000 biztanleko) eremu gorrian dago, baita Bilbo eta lurraldeko udalerri ia guztiak ere. Ez dago bakar bat ere horian edo berdean, eta hiru bakarrik eremu laranjan.

Zalla gune horira igaro da, datu epidemiologikoak berriro hobetu dituelako.

Gipuzkoa (499 kasu 100.000 biztanleko) eremu gorrian dago, baita hiriburua eta ia udalerri guztiak ere: Pasaia, Andoain, Aretxabaleta, Astigarraga, Azkoitia, Azpeitia, Beasain, Deba, Donostia, Eibar, Errenteria, Hondarribia, Irun, Lezo, Mutriku, Oiartzun, Ordizia, Tolosa, Urnieta, Urretxu, Villabona, Zarautz, Zumaia eta Zumarraga.

Pasaia gune kritikora itzuli da, egun bakar bat laranjan igaro ondoren.

Lasarte-Oriak ere atzerapausoa eman du, eta eremu laranjara itzuli da.

Ez dago udalerririk eremu berdean.

Europar Batasunak onartutako koloreen mapa egokitu du Jaurlaritzak, eta azken 14 egunetan metatutako intzidentzia-tasaren arabera sailkatzen ditu EAEko udalerriak.